Një shtetas është gjetur i pajetë mesditën e kësaj të shtune në lagjen “Apollonia” në Fier. Raportohet se në katin e tretë të një pallati është gjetur i pajetë shtetasi Bajram Brataj, rreth 60 vjeç. Nuk dihen ende shkaqet e vdekjes së tij, por dyshohet për shkaqe natyrale.
Ndërkohë, kanë qenë banorët e pallatit, të cilët kanë lajmëruar policinë për shkak të aromës së rëndë që vinte nga banesa e viktimës.
Mendohet se ai ka disa ditë që ka ndërruar jetë, pasi trupi është gjetur tërësisht i dekompozuar. Shërbimet zjarrfikëse kanë mundur të hyjnë nga dritaret e banesës, pasi dera qëndronte e mbyllur, për të nxjerrë trupin e pajetë.
“Sot rreth orës 13:00, në katin e tretë të një pallati në lagjen ‘Apollonia’ është gjetur i vdekur i dekompozuar shtetasi B.B, 89 vjeç, i cili jetonte vetëm në banesë. Paraprakisht dyshohet se vdekja ka ardhur për shkaqe natyrale. Grupi hetimor po punon për zbardhjen e plotë të ngjarjes“, njoftoi policia.
