Ish-sulmuesi i njohur francez Nikolas Anelka arriti të luante me shumë klube të mëdha Europiane, duke lënë gjurmë. Tashmë në moshën 40-vjeçare, në një intervistë për “Tuttojuve”, Anelka tregon se aventura me Juventusin në vitin 2013 ka qenë dështimi më i madh në karrierë.
Francezi nuk arriti të përshtatej me skuadrën italiane, duke u larguar menjëherë, pas vetëm 2 ndeshjesh me fanellën bardhezi. Në prononcimin e tij, 40-vjeçari tregon se i vjen turp kur përmendet eksperienca e tij me “Zonjën e Vjetër”.
“Vendosa të transferohesha te Juventusi, sepse ishte një klub i shkëlqyeshëm, me histori dhe gjithashtu ishte në vendin e parë në kampionatin italian. Për fat të keq, ishte eksperienca ime më e keqe pasi kam luajtur vetëm 45 minuta dhe nuk doja më ta vishja fanellën e Juventusit para tifozëve.
Sinqerisht, kur dikush më flet për Juventusin, dua të ndërroj temë pasi më vjen turp nga ai transferim. Kam luajtur dhe shënuar në të gjitha skuadrat ku kam shkuar, përveç Juventusit. Kështu që pavarësisht dështimit, nuk mund të them se isha ai tip lojtari si në Torino”, u shpreh Anelka.
