Kreu demokrat Lulzim Basha hodhi akuza të forta ndaj Prokurores së Përgjithshme, Arta Marku, dhe drejtueses së Prokurorisë së Krimeve të Rënda, Donika Prela.
Basha tha se Marku dhe Prela po sillen si pjesë e grupit të Rilindjes, duke tentuar të shpëtojnë kupolën e Rilindjes, e përfshirë si një grup kriminal, në tjetërsimin e votave të shqiptarëve.
“Mashat e Edi Ramës në prokurorinë shqiptare, Donika Prela dhe Arta Marku, janë të ndëshkueshme nga ligji, kanë shpërdoruar nga ligji.
Ato janë Katicat e Shqipërisë, njëlloj si ajo prokurorja maqedonase që iu vunë prangat, dhe duhet të ndiqen penalisht”, tha Basha.
Kreu demokrat akuzoi dy prokuroret dhe Edi Ramën se po bëjnë çdo përpjekje për të mbyllur dosjen 184, të njohur tashmë ndërkombëtarisht, para ngritjes dhe funksionimit të SPAK.
Kreu demokrat akuzoi Prokurorinë se është bërë pjesë e Organizatës Rilindja, pasi nuk ka vepruar qoftë në rastin e Valdrin Pjetrit, i cili sot duhej të ishte marrë nën hetim dhe të çohej para drejtësisë, ashtu edhe në rastin e Agim Kajmakut.
“Jemi në një moment shumë delikat, koha nuk pret. Do të shpalosim një platformë masash për Shqipërinë si gjithë Europa, si një platformë kombëtare, që të mos humbim më shumë kohë duke mbyllur derën europiane për Shqipërinë, duke i dhënë fund krizës politike, duke nxjerrë kriminelët jashtë institucioneve, për t’i nxjerrë ata nga ekonomia”, tha Basha.
