Parti, ti je nona…

 

Nga Boldnews.al

Kryetari i Partisë Socialiste dhe komandanti legjendar që e çoi partinë nga fitorja në fitorje dha urdhër të prerë: “Valdrin Pjetri është kandidat për bashkinë Shkodër, ai do jetë edhe koordinator në këtë qark”-mbledhja mbyllet, diskutime nuk ka. Fjala u tha, vendimi u mor.

Shkodranëve socialistë dhe Rilindas bashkë, nuk u mbeti gjë tjetër përveçse të më 30 qershor të shtrëngonin radhët për të siguruar sa më shumë pjesëmarrje, që me shumë mund, edhe me ndihmën e paçmuar të shokëve të partisë në Komisionin Qëndror të Zgjedhjeve, e çuan shifrën zyrtarisht në 10.3 përqind të votuesve.

Valdrini fitoi bashkinë ende pa u hapur kutitë e votimit. Por “armiqtë e brendshëm” të partisë dhe diktaturës së ploretariatit, i nxorrën vendimin që ishte dënuar në Itali për mbajtje dhe trafikim të lëndëve narkotike. Ai dha dorëheqjen i detyruar, pasi qëndresa e tij do të dëmtonte imazhin e “të madhit” në pushtetin qëndror.

Megjithatë partia dhe ai i madhi dhe ca të mëdhenj lokal pranë tij, donin të paktën Këshillin Bashkiak ta kontrollonin totalisht. Një emër i panjohur anonim, por me hire, doli në skenë, natën vonë të datës 18 gusht, me urdhër nga lart. Ajo është Brisiela Kadija, një personazh i shtuar në listën e preferencave politike dhe të tarafit të superdeputetit të Shkodrës Tom Doshi.

LEXO EDHE  Dilni, merrni fëmijët dhe shkoni në.../ Këshilla e Veliajt për prindërit

Si “emisarë” për të çuar deri në fund urdhrin dhe vendimin e marrë në ndonjë skutë në Tiranë, u zgjodhën dy deputetët socialistë, Senida Mesi dhe Luan Harusha. “Është urdhër i kryeministrit, kush nuk voton Brisielën do të përjashtohet nga partia”-kaq u tha në mbledhje dhe të gjithë anëtarët e Këshillit Bashkiak të Shkodrës, që të gjithë të majtë, në rrënjë e degë, duhet të ngrinin duart përpjetë, si në shenjë dorëzimi, ashtu edhe aprovimi pa dëshirë për kryetaren e re.

Ashtu u bë të nesërmen më 19 gusht 2019, ku njëri pas tjetrit këshilltarët ulën krye dhe votuan emrin e zonjës së propozuar nga Doshi dhe aprovuar nga Rama. Arroganca triumfoi, Shkodra për ta ka rënë. Në fillim morën këshillin bashkiak, tashmë do bëjnë çmos edhe pa asnjë bazë ligjore që të largojnë me hir e pahir nga zyra kryebashkiaken Voltana Ademi.

Pushteti absolut ka errësuar çdo element të demokracisë edhe brenda partisë. Koncepti zgjedhje nuk ka më vend. Gjithaçka me emërim, me paracaktim dhe me detyrim. Rroftë Rilindja! Rroftë kryetari Edi Rama…! Vendimi u shpall në Shkodër datë 19 gusht 2019.