Sot pritet të konstituohet Këshilli Bashkiak i Shkodrës, ndërsa opozita ka paralajmëruar protesta.
Sipas socialistëve, kjo mbledhje konstituimi shënon nisjen e punës nga Këshilli i ri Bashkiak, i cili pritet të deklarojë përfundimin e mandatit për Voltana Ademin, kryebashkiaken aktuale të Shkodrës.
Hapi i dytë, sipas socialistëve, do të jetë zgjedhja e një prej nënkryetarëve, që do të mandatohet për të drejtuar bashkinë, deri në zhvillimin e zgjedhjeve për kryebashkiak.
Valdrin Pjetri, kandidati i Rilindjes për Bashkinë e Shkodrës, u tërhoq nga marrja e detyrës, pas publikimit të dokumenteve që sipas opozitës, provojnë dënimin e tij me 18 muaj burg nga drejtësia italiane.
Prokuroria e Përgjithshme ka nisur një hetim, duke kërkuar informacione lidhur me dënimet e Pjetrit në vendin fqinj.
Partia Demokratike, dega Shkodër, ka paralajmëruar zhvillimin e protestës së radhës kundër marrjes së bashkisë nga ana e socialistëve. Gjatë ditës së djeshme i është bërë thirrje socialistëve që të tërhiqen nga procesi, ndërkohë që duket se Shkodra do shërbejë edhe si një provë, jo vetëm për Rilindjen, por edhe për opozitën.
Deri më tani të gjithë kryebashkiakët e opozitës, pavarësisht deklaratave të mëparshme, kanë dorëzuar zyrat e tyre.
