Vendosja e memorialit të ushtarëve të rënë turq, gjatë grushtit të dështuar të shtetit 3 vjet më parë në Turqi, ka shkaktuar reagime të shumta. Kryesisht kundërshtitë kanë ardhur nga shoqëria civile, por edhe nga mediat ndërkombëtare, që kanë kërkuar veçanërisht transparencë lidhur me vendimin e Kryebashkiakut Erjon Veliaj.
Së fundmi kundër vendosjes së memorialit ka reaguar, Ambasadori i Kosovës në Shkup, Gjergj Dedaj, i cili duke folur pa doreza, ka hedhur propozimin që në atë vend duhej të ngrihej memoriali i Gjenocidit të Perandorisë Otomane, ose ai i Krimeve të Komunizmit.
“Jo memorial politik të Turqise së Erdoganit në Tiranë! Aty e ka vendin ndonjë memorial i Gjenocidit të Perandorise Otomane, i Masakrës së Tivarit, Krimeve të Komunizmit, i Luftës së Kosoves, por asnjëherë i politikës aktuale të Turqisë së Erdoganit”, shkruan Ambasadori Dedaj në rrjet.
Duket se ky qëndrim nuk është mirëpritur nga Ambasada turke në Shkup.
Kjo e fundit thekson se refuzon çdo takim me përfaqësuesin diplomatik të Kosovës në Shkup. “Pritshmëria jonë nga miqtë tanë është që të tregojnë solidaritetin dhe bashkëpunimin e nevojshëm ndaj vendit tonë, në luftën e vendosur kundër organizatave terroriste, veçanërisht atë të ndërmarrë kundër FETO-s nga vendi ynë i cili ka dhënë një provë për t’u vlerësuar në mbrojtje të demokracisë”, thuhet në deklaratën e ambasadës turke në Shkup.”