Bashkia e Shkodrës, konstituimi i Këshillit Bashkiak dhe thirrja e PD drejtuar Ramës/ Çfarë pritet

Prefekti i Shkodrës pritet të konstituojë të hënën Këshillin e ri Bashkiak të Shkodrës të dalë nga votimet e 30 qershorit. Në këtë mbledhje, sipas rendit të ditës, pritet që këshilltarët të bëjnë betimin dhe të marrin zyrtarisht detyrat.

Por jo vetëm kaq. Në mbledhjen e parë, pritet që një nga nënkryetarët të mandatohet si Kryebashkiak në detyrë, duke zëvendësuar Voltana Ademin, mandati i së cilës sipas socialistëve përfundon me 20 gusht.

Por ky skenar i socialistëve konsiderohet si anti-kushtetues nga opozita.

Situata në Shkodër është ndërlikuar edhe për vetë PS-në, pasi Valdrin Pjetri, kryebashkiaku i shpallur fitues nga votimet e 30 qershorit, deklaroi tërheqjen nga marrja e detyrës, pas publikimit të dokumenteve që provonin dënimin e tij nga drejtësia italiane. Pjetri po hetohet nga prokuroria, pasi në formularin e vetëdekriminalizimit nuk kishte deklaruar dënimin, që e ndalonte të kandidonte.

Ndërkohë, PD e Shkodrës i ka drejtuar një thirrje Rektorit të Universitetit“Luigj Gurakuqi”, “të ruajë strikt asnjanësinë institucionale dhe të mos e përziejë auditorin e dijes universitare në lojën e pisët të partisë socialiste”.

“Përpjekja e 30 qershorit për të instaluar një pushtet monist është refuzuar në mënyrë plebishitare nga elektorati i Shkodrës. Çdo përpjekje për të injoruar me arrogancë mesazhin e shumicës së qytetarëve të Bashkisë Shkodër, përmes thirrjeve të paligjshme për mbledhjen e institucion- eve moniste të demaskuara tanimë botërisht, i konsiderojmë një provokim ndaj rendit normal të punëve në komunitetin tonë dhe përsëritje e veprimeve dhunuese, që kasta puniste e ushtarakëve të përdorur të Tiranës kërkon t’i rinovojë 30 vite pas përmbysjes së regjimit të etërve. I bëjmë thirrje Rektorit të Universitetit të Shkodrës, “Luigj Gurakuqi”, të ruajë strikt asnjanësinë institucionale dhe të mos e përziejë auditorin e dijes universitare në lojën e pisët të partisë socialiste“, thuhet në deklaratën e degës së PD-së.

LEXO EDHE  ‘U gdhi poshtë shtëpisë së Tahirit’, Joleza Koka ‘godet’ sërish: Ja pse kur ka tërmet duhet të kenë dyert…

Në vijim, demokratët theksojnë se “e njëjta thirrje i adresohet çdo drejtuesi tjetër rajonal ku shpura e të bojkotuarve do të kërkojë të fshihet për të kryer një akt të paaprovuar!”.

“Thirrja dhe akuza kryesore i drejtohet Edi Ramës: Larg duart nga Shkodra dhe mos e shndërro kryeqendrën e Gegnisë në një fushëbetejë të parë të përplasjes së reparteve tuaja paramilitare me qytetarët e lirë! Ju duhet t’i kërkoni falje dhe të tërhiqeni nga Shkodra në pritje të garës së ndershme dhe jo të vijoni aksionin uzurpues ndaj saj! Qytetarëve të Shkodrës i bëjmë thirrje që ditën e hënë të bashkohen me anëtarët e Këshillit Legjitim Bashkiak, deputetë dhe kryesinë për të protestuar paqësisht në mbrojtje të autonomisë vendore, të drejtave pluraliste dhe demokratike që shoqëria sh- kodrane ka promovuar në histori”, thuhet në deklaratën e degës së Partisë Demokratike të Shkodrës.