Duke pritur Jozefinën

Nga Boldnews.al

Një betejë minore e opozitës dhe një përshkallëzim i pamend i qeverisë e ka kthyer situatën në Shkodër në pikën zero, atje ku ishte përpara 30 qershorit.

Valdrin Pjetri, kandidati monopartiak i Rilindjes në Shkodër, dha dorëheqjen dhe tashmë, “de jure” (sipas KQZ-së), Bashkia e Shkodrës mbetet pa kryetar.

Në këto kushte, disa janë skenarët ose pyetjet që mund të ngrihen për një proces të mundshëm zgjedhor në bashkinë bastion të së djathtës, në qytetin ku ish numri dy i PD-së, Jozefina Topalli, pretendon se ka mbështetjen më të madhe popullore.

E sigurtë është që në dy muajt e ardhshëm, qoftë edhe në 13 Tetor, në Shkodër do të ketë zgjedhje. Nëse i referohemi deklaratave të opozitës, sërish do të ketë bojkot në këto zgjedhje, çka do të thotë një fushë e tërë bosh vetëm për Rilindjen.

Në një status në rrjetet sociale, ish numri dy i PD-së, Topalli, hedh gjithë akuzat e mundshme politike nga kryetarit të PD-së, Lulzim Basha. Nuk thonë kot që rastësia është mbreti i botës. Tanimë rastësia e solli që Jozefina të na provojë se ka të drejtë.

Rilindja, me siguri, do vendosë një kandidat të ri në kryeqendrën e veriut dhe opozita do bëjë sehir se si ky i fundit mer bastionin më të rëndësishëm antikomunist në vend.

LEXO EDHE  Tirana pa energji/ OSHEE: Ja zonat dhe oraret kur do të stakohet rryma

Është rasti yt Jozefinë! Futu në garë, kandido, në daç si e pavarur, në daç nën siglën e partive të reja të krijuara nga Rilindja nën shembullin e Bashkimeve Profesionale. Hyr në garë dhe fito. Na trego të gjithëve që Lul Basha e ka gabim. Tregoji Lulit se ti mund të fitosh aty dhe paskëtaj, me të drejtë, mund ta shtrish projektin në të gjithë Shqipërinë.

Por, si fillim, na trego se sa të besojnë dhe të votojnë qytetarët e Shkodrës. Futu në një provë force që të shohim se me kë janë qytetarët- me ty apo me Lulin.

Po fitove aty, me siguri mund të bësh namin në të gjithë Shqipërinë. Ama, po humbe, struku diku dhe mos u merr më me politikë. Nëse nuk kandidon dhe vazhdon veçse me deklarata politike, atëherë i jep të drejtë idhtarëve të Lul Bashës se thjesht po përdoresh nga Edi Rama.

Merr shembull nga Astrit Patozi, i cili, më mirë vonë se kurrë, por e provoi se sa qytetarë ka nga pas. Të paktën tanimë e dinë edhe ata që ai mban afër se politika do akte dhe jo veç fjalë.

Jemi duke të pritur Jozefinë, bëje për Shkodrën, për Shqipërinë, për vete dhe për Lulin.