Policia e Shkodrës ka zbardhur plagosjen e një dite më parë të ndodhur në këtë qytet, ku shtetasi Vat Shpati, 38 vjeç, vëllai i një oficeri policie, u qëllua me thikë.
Policia njoftoi zyrtarisht se ka arrestuar 3 personat e dyshuar të ngjarjes. Ata janë S.P 36 vjeç, dhe vëllezërit A.M dhe P.M, përkatësisht 28 dhe 29 vjeç, banues në Shkodër.
Njoftimi i policisë
Vihen në pranga nga Policia e Shkodrës 3 autorët e dyshuar të ngjarjes
Nga strukturat e Drejtorisë Vendore të Policisë Shkodër në bashkëpunim me Komisariatin e Policisë Shkodër, pas një pune të mirëorganizuar dhe intensive u bë kapja dhe arrestimi i shtetasve:
S. P. 36 vjeç, banues në Shkodër.
A. M. 28 vjeç, dhe P. M. 29 vjeç, banues në lagjen “Mark Lula”, Shkodër, (vëllezër).
Më datë 12.08.2019, rreth orës 12:10, në lagjen “Mark Lula”, pas një konflikti të çastit, në bashkëpunim me njëri-tjetrin kanë plagosur me armë të ftohtë (thikë) shtetasin V. Sh. 38 vjeç, banues në Dobraç, Shkodër, i cili po merr mjekim në Spitalin Rajonal Shkodër, nën kujdesin e mjekëve.
Materialet i kaluan Prokurorisë Pranë Gjykatës së Shkallës së Parë Shkodër për veprat penale “Plagosja e rëndë me dashje” e kryer në bashkëpunim” dhe “Prodhimi, mbajtja, blerja apo shitja pa leje e armëve të ftohta” .
