Ministri i Brendshëm italian, Matteo Salvini, ka bërë një reagim të fortë ndaj aktorit hollivudian Richard Gere, i cili ka vizituar 121 refugjatët, mes të cilëve 32 fëmijë, që ndodhen në një varkë spanjolle në Lampedusa.
Gere i bëri thirrje qeverisë italiane që ti japë fund politikës së saj kundër emigrantëve, ndërsa krahasoi politikat e ndjekura nga ministri Salvini me ato të presidentit Donald Trump, kundër refugjatëve.
“Ne kemi problemet tona me refugjatët që vijnë nga Hondurasi, Salvadori, Nikaragua, Meksika. Është situatë e ngjashme me atë që ju po kaloni këtu. Por kjo situatë duhet të marrë fund njëherë e mirë kudo në këtë planet. Dhe do të marrë fund kur ne të themi mjaft më. Unë dua thjesht të ndihmoj dhe jo të futem në një luftë politike”, tha Gere.
Por në reagimin e tij, Salvini shkruan “falënderojmë milionerin bujar që i dha zë shqetësimit mbi fatin e emigrantëve. Ai mund të kthehet në Hollivud, me avionin e tij privat dhe të marrë me vete emigrantët që t’i strehojë në vilat e tij. Faleminderit Richard”.