Vendosja e një meoriali në Parkun e Liqenit në Tiranë, në kujtim të të rënëve në grushtin e dështuar të shtetit në Turqi ka shkaktuar reagime të shumta.
Kjo për vetë faktin se memoriali nuk përfaqëson ushtarë që kanë rënë në territorin shqiptar, por gjatë grushtit të dështuar të shtetit në Turqi, ngjarje që s’ka asnjë lidhje të drejtpërdrejtë me Shqipërinë.
Por duket se Erjon Veliaj, kryebashkiaku i Tiranës, nuk mendon kështu.
Pavarësisht mungesës së transparencës në marrjen e një vendimi që lejonte vendosjen e memorialit, Veliaj ka zgjedhur t’i përgjigjet kritikëve ditën e Kurban Bajramit.
“Në atë territor ka mbi 50 pika, ku janë kujtuar raste të ndryshme, dhe secili ka mundësi të respektohet. Unë do të thosha t’i lëmë të vdekurit të qetë dhe kush do që t’i respektojë me një qiri, me një lule apo me një lutje, t’i lëmë gjithashtu të qetë. Tirana zemërmadhe ka vend për të gjithë.
Ndaj, për të gjithë ata që vapa e gushtit i kapi në ngut për fletërrufe, s’ka ndodhur asnjë hata, le më tradhti apo ndonjë shkelje e kësaj natyre. Pushime të mbara të gjithëve dhe gëzuar festën”, tha Veliaj.
Madje, kryebashkiaku shkon edhe më tej, kur thotë se memoriali nuk i prish punë askujt në cepin ku është vendosur.
“Nuk i prish punë askujt. Më thonë është në cepin e Liqenit, ku shumica prej atyre që ankohen as iu ka rënë në mendje kur ishte mbuluar me ferra dhe kur digjej plastikë dhe ku zaptohej si territor. Lart, në katin e dytë të KMSH lashë duke u përqafuar drejtuesin e të krishterëve me drejtuesin e myslimanëve. Kjo është fryma e kësaj feste, të fokusohemi tek gjërat që na bashkojnë. Tek Liqeni dhe në të gjithë Tiranën ka vend për të gjithë”, nënvizoi Veliaj.
Në fakt debate dhe reagimet nuk kanë të bëjnë me vendin apo hapësirën që ka zënë memoriali, por me një ccështje, e cila në të ardhmen, në rast të ndryshimeve politike në Turqi, mund të vendosë raporte të tjera ndërshtetërore. Por duket se Kryebashkiaku për momentin ndjehet mirë, aq më tepër kur nuk shquhet si ndonjë njohës i zhvillimeve diplomatike.