Tre shtetasit shqiptar, Halit Mazrreku, 24 vjeç, Elson Zani, 23 vjeç dhe Kristjan Kola, 22 vjeç, u kapën duke u kujdesur për fermat e kanabisit në shtëpitë në Rrugën Lee dhe Rrugën Mersey, në lindje të Hull dhe Devon Grove në perëndim të Hull, kur policia bastisi këto banesa në 26 nëntor të vitit të kaluar.
Ata vendosën të punojnë në fermat me kanabis në Hull për të shlyer borxhet që kishin marrë për të mbërritur si klandestinë në Britani të Madhe.
Të tre kishin hyrë në Britani të fshehur në kamionë dhe nuk kishin qenë në gjendje të paguanin borxhet që kishin marrë, u tha në gjykatën e Hull Crown.
Nëna e Mazrrekut që atëherë është kërcënuar vazhdimisht nga banda që qëndron pas “sindikatës së madhe të prodhimit të kanabisit”, raportojnë mediat britanike.
Gjatë marrjes në pyetje, Mazrreku, pa asnjë adresë fikse, tha që ishte sjellë në Britani të Madhe me kamion dhe po punonte në shtëpinë me kanabis për të “paguar për kalimin e tij”. I pyetur nëse mendonte se banda që ndodhej pas këtij aktiviteti kriminal, do të dëmtonte familjen e tij, ai tha: -“Unë kam vetëm nënën, kështu që mendoj se po”
“Nëna e tij i tha se ishte kërcënuar,” tha z. McGonigal.
Kola, pa adresë fikse, tha se kishte punuar në lavazh, por nuk po fitonte aq sa duhet për të paguar borxhin e marrë. Zani, gjithashtu bënte të njëjtën punë dhe mohoi të kishte dijeni për fermën e kanabisit, duke thënë se kishte fjetur në pronën ku ishte arrestuar.
Të tre më vonë pranuan prodhimin e kanabisit, ndërsa Zani gjithashtu u deklarua fajtor për vjedhjen e energjisë elektrike. Mazreku dhe Kola nuk kishin asnjë dënim të mëparshëm, ndërsa Zani kishte dënime për kundërvajtje drejtimi dhe mbajtje të kokainës dhe kanabisit.
