Kreu demokrat Lulzim Basha deklaroi sot se ekonomia është kapur nga mafia, ndërsa theksoi se projektet e ndërtimeve në qendër të Tiranës dhe në shumë zona në jug të vendit po financohen me paratë e drogës.
Basha tha se jo vetëm projekti te Teatri Kombëtar, por edhe në ndërtime të tjera në vend, projekte të njohura dhe të panjohura deri më tani, janë financuar nga paratë e krimit, të ardhura nga droga apo veprimtari të tjera kriminale.
“Drota dhe krimi kërcënojnë sigurinë tonë kombëtare. Në shtator do të bëjmë publik planin tonë kundër krimit, dhe parave të krimit që kanë kapur sot ekonominë”, paralajmëroi Basha.
Në bashkëpunim me shërbimet e specializuara ndërkombëtare, do të kryhet hetimi mbi financimin nga krimi të projekteve të ndryshme, pronat e vjedhura, do të gjurmohet paraja, jo vetëm në Shqipëri, por në çdo vend tjetër të Botës, theksoi Basha.
Sipas tij, agjensi të specializuara kanë shprehur gadishmërinë për të ndihmuar opozitën në hartimin e një plani, që parashikon hetime të thelluara për çdo rast jo vetëm të ndërtimeve, apo projekteve që janë në zbatim, por edhe të PPP-ve.
“Do të hartohet një paketë e plotë për hetimin e parave të përfshira në PPP, për politikanët, kompani shqiptare apo të huaja, si shqiptare, daneze apo italiane, do të jenë subjekt i hetimit të pasurive të tyre.
Lufta kundër krimit të organizuar ka si prioritet zbulimin e parave që iu janë vjedhur shqiptarëve, Shqipëria nuk do të jetë tokë e djegur, por do të jetë një parajsë lokale të investitorëve. Do të jetë ferr për krimin e organizuar, paratë e krimit dhe politikanët e korruptuar”, tha Basha.
