Detaje të reja janë zbuluar nga grabitja ndaj një banese në Kosovë, ku një prej grabitësve ka mbetur i vrarë nga pronarët e shtëpisë.
Ngjarja ndodhi në Godanc të Shtimes. Plani i grabitësve nuk shkoi ashtu siç e kishin menduar, pasi ata u ndeshën me pronarët e shtëpisë. Në përplasjen e zhvilluar njëri nga grabitësit mbeti i vdekur, ndërsa i zoti i shtëpisë u plagos, por është jashtë rrezikut për jetën.
Tashmë është zbuluar edhe identiteti i grabitësit të vrarë. Indeksonline mëson se ai është Fehmi Gashi nga Prishtina, trupi i të cilit u gjend i vdekur 300 metra nga shtëpia ku kishte hyrë për të grabitur.
Dyshohet se viktima është djali i një zyrtari të policisë. Kjo është konfirmuar për Indeksonline, nga zëdhënësi në Policinë e Kosovës, Baki Kelani, i cili ka shtuar se janë duke u marrë me zbardhjen e rastit.
“Në bazë të informacioneve/verifikimeve të deritanishme dyshohet se personi në fjalë është djali i një zyrtari policor. Policia e Kosovës është duke punuar intensivisht në hetimin dhe zbardhjen e këtij rasti”.
Prokuroria Themelore në Ferizaj ka njoftuar se me urdhër të prokurorit kujdestar, janë ndaluar dy persona në kohëzgjatje prej 48- orësh dhe trupi i pajetë i viktimës është dërguar për obduksion në Institutin e Mjekësisë Ligjore.
