Nga Boldnews.al
Kryeministri Edi Rama kridhet në det dhe sponsorizon gazetarët e oborrit qeveritar që ti bëjnë ndonjë video, kur ai noton mes stilit miks, bretkosë dhe qen bashkë. Presidenti i vendit tregon anën institucionale, duke nxjerrë cdo ditë nga një lajm, në kthimin e ligjeve, apo edhe deklaratave se si mund të zgjidhet kriza.
Kryedemokrati Lulzim Basha vijon takimet rreth më rreth, për të mbajtur nën tonus pjesën demokrate që po artikulohet për zgjedhje të parakohshme. Të gjithë në qëllime të ndryshme dhe askush nuk është në gjendje të thotë se çfarë pritet në shtator, aty ku palët do përplasin fort brirët. Se kush do të fitojë mbetet për tu parë, por humbës të vërtetë, deri më tani janë qytetarët e vendit.
Ata që nuk ndihen dhe kanë ulur kokën para dhunës qeveritare, që vuajnë çdo ditë varfërinë, punojnë me djersën që u shkon çurk dhe në darkë vonë, kur duan të pushojnë, dëgjojnë lajme të tilla: “Konçensione 500 milionë euro i dy rrugëve, konçensioni 310 milionë euro i shëndetësisë që kurrë nuk u bë falas…, korrupsioni, kuponi, shezloni i sekuestruar nga policia dhe ministresha që propagandojnë “Shqipërinë e lumtur, të pasur dhe që jeton në paqe me udhëheqjen e ndritur të Rilindjes”.
Kakofoni e madhe edhe në bashkitë e vendit. Rilindja bredh lokal më lokal ku pihet raki e fortë rrushi, (me dhe pa sheqer), ku të ftuar janë të paktën dy personazhe si Elisa Spiropali dhe Taulant Balla, të cilët duartrokasin spektaklin e zgjedhjes së Këshillave Bashkiakë dhe betimet e kryetarëve të rinj të bashkive, të dala nga votimet moniste të 30 qershorit. Të gjithë këto skena dhe shfaqje janë për vetë ata dhe spektatorët qytetarë ose duhet të klithin në ovacione, ose të heshtin përgjithnjë, por zë kundër nuk guxon kush të nxjerrë.
Vendi po jepet i gjithi me konçension, ku kompani brenda oazit kryeministror gjithnjë dalin fituese në një proces ku vetë kërkojnë, vetë ofrojnë dhe po vetë fitojnë. Zërat kritik që vijnë nga përfaqësues të opozitës shuhen shpejt nga propaganda qeveritare që po punon si në ditën e fundit. Qeveria ngjan me një pushtues të humbur, që në ikje urdhëron ushtrinë që të rrëbejë çtë mundet nga pasuria dhe ajo që mbetet pas të digjet.
Kjo është Shqipëria e sotme nën sytë e kryeministrit që lan “mekatet” të detin e kripur të Jonit dhe opozitës që nisi me kauza të forta, por po afron vjeshta me kauza të papërfunduara, kjo edhe si rezultat i diktatit të fortë që ka nisur kupola drejtuese e Rilindjes. Kryeqeveritari kontrollon gjithçka, çdo pushtet të mundshëm, madje është i vendosur të çojë deri në fund marrinën që votimet e 30 qershorit ti konsiderojë: “të lira, të ndershme, konkurruese dhe demokratike”.
I vetmi zë institucional ka mbetur i kreut të shtetit, i cili ka lënë disi staturën presidenciale dhe po përfshihet drejtëpërdrejtë në politike, duke reaguar çdo ditë, në çdo formë, me akte institucionale siç janë dekretet, konferenca të gjata shtypi dhe njoftime për mediat.
Por edhe ai është thjesht për një lajm, pasi qeveria majë kalit të majmur po tërheq pas me dhunë dhe propagandë qytetarët që janë kthyer në hyzmeqarë të kalorësit të parë dhe të gjithë kalorësve të tjerë që tjekin pas epokën e Rilindjes.
