Në mediat serbe ditë më parë qarkulloi lajmi se gjithmonë e më shumë të rinj po kërkojnë të martohen me femra shqiptare. Madje ata janë të gatshëm të paguajnë edhe shuma të caktuara parash.
Dhe sipas asaj që shkruhet një nuse paguhet deri në 4 mijë euro për martesë.
Vetëm në zonën e Rashkës, Peshterit, Golijas, Javorit dhe Jadovikut janë martuar mbi 150 shqiptare me serbë dhe ato deri tani kanë krijuar familjet e tyre me shumë fëmijë.
Ndërsa, martesa të tilla janë bërë edhe në Kosovë. Një punonjës i shërbimeve sociale në Skenderaj, ka treguar për Indeksonline se në dy fshatra të kësaj komune janë katër raste të tilla. Madje sipas këtij burimi këto shqiptare nuk pranojnë të flasin shqip.
“Unë jam punonjës social dhe në bazë të detyrës zyrtare jam marrë me to. Është e kot, ato nuk pranojnë të flasin shqip. I kemi dy fshatra serbe dhe gati për ditë kam punë me ta. Për katër raste e di, por kam dëgjuar që është edhe një, të gjitha janë kushërira të shkrimtarit Migjeni që kanë prejardhje nga Vraka”, ka thënë burimi.
“Unë merrem me probleme familjare. I kanë blerë si kafshët, me ndërmjetësues ose trafikant. Burrat e tyre janë të kënaqur shumë me to se ato janë shumë punëtore”, thotë ai.
Madje thuhet se në Shqipëri ekziston një agjensi ku serbët paguajnë mbi 3 – 4 mijë euro për një nuse shqiptare.
