Nga Boldnews.al
PPP 1-Në artikulimet e tij të para në qeverisjen “Rama 1”, 2013-2017, kryeministri shpiku një metodë abuzimi me taksat qytetare dhe krijim të një grupi oligarkësh me PPP-të (Partneriteti Publik Privat), ose i njohur ndryshe konçensione hibride. E nisi me shëndetësinë këtë projekt pilot, e cila më vonë u shtri në të gjithë sektorët shtetërore.
Kryerja e analizave nga një kompani private, dhënia me konçension e Hemodializës, dezinfektimin e pajisjeve kirurgjikale, ishin tre konçensione gllabëruese që nxorrën në skenë edhe një personazh tipik të Rilindjes, si ish-ministrin e shëndetësisë Ilir Beqja. Behet fjalë për afër 311 milionë euro kontrata, që alarmuan edhe ekspertët ndërkombëtarë, por Rama nuk hoqi dorë.
Kjo ishte dhe mbetet forma më e mirë për të rrëmbyer miliona dhe njëkohësisht paracaktuar një grup të vogël oligarkësh, që e gjetën veten miliarderë nën qeverisjen e kryeministrit Rama. Ndonëse shërbimi nuk njohu rritje cilësore, kreu i qeverisë vijoi me këtë metodë edhe për ndërtimin e rrugëve dhe në fusha të tjera. Parashikohet se ky projekt (PPP-të), për dy mandate qeverisëse të epokës Rama, do marrë 2 miliardë euro, të cilat po paguhen dhe do të paguhen nga buxheti i shtetit (taksat qytetare) për dhjetë vitet e ardhshme.
PPP 2-E gjithë ngrehina e shtetit, që kontrollohet në çdo qelizë të saj nga kryeministri Edi Rama kërkon një garanci që të mos hetohen dhe mos preket asnjë nismë e kryerilindasit. Garancia i vjen vetëm nga një sistem drejtësie i kontrolluar prej tij. Fati erdhi në derën kryeministrore në dhjetorin e vitit 2017, kur u zgjodh Prokurore e Përgjithshme e Përkohëshme (PPP), me 69 vota të së majtës në pushtet, Arta Marku.
Shpërblimi nuk i vonoi, pasi institucioni i akuzës është kthyer sot në një shtojcë të vetëofruar të pushtetit të kryeministrit. Dosje të reja hetimore kundër korrupsionit të zyrtarëve të lartë nuk janë hapur, ata që ndodheshin janë arkivuar dhe ka një përkujdesje për to për të mos shkuar kurrë në gjykatë, ose të mbërrijnë atje të cunguara, ku pafajësia e të fajshmëve është e garantuar.
Gjithashtu sistemi i ri i drejtësisë po kontrollohet që në gjenezë nga njerëzit e Rilindjes, të kamufluar pas Organizatave jo Qeveritare, që bënë karrierë nga fondet e të famshmit Xhorxh Soros.
PPP 3-Para, pushtet dhe propagandë. Pa këto të trija, të bashkuara në një qëllim nuk mund të kishte jetën e gjatë kreu i qeverisë. Me shumat e madha të siguruara nëpërmjet konçensioneve, afrimit të një grupi të vogël oligarkësh që kanë copëtuar dhe kafshuar çdo pasuri të shqiptarëve, nuk mund të mbijetonin pa pjesën propagandistike.
Gjithçka është një botë virtuale të shpikur nga kryeministri dhe mbajtur nga ministrat dhe armata e propaganduesve televiziv dhe të rrjeteve sociale. Qytetarët janë të vrarë psikologjikisht në çdo moment nga propaganda qeveritare, që paraqet një Shqipëri imagjinare dhe transmetohen “sukseset” po aq imagjinare të qeverisë.
Pjesa tjetër është sulmi ndaj kundërshtarëve politik, ku nuk merren me përmirësimet në mënyrën qeverisëse, por denigrimin e kundërshtarëve. Kryeministrit nuk i mjafton vetëm ai zë absurd që vjen nga ERTV (Edi Rama Televizion, një gjetje unike, që nuk haset në asnjë vend të zhvilluar), ndaj hodhi sytë nga mediat e mëdha në vend.
Tre televizione të cilat ndajnë më mes tyre shikueshmërinë publike janë kthyer me dëshirë në mbrojtëset më të madha dhe propagandueset e qeverisë, lokale dhe qendrore të drejtuar e gjitha nga Rilindja.
Benefitet për ta nuk mungojnë, ku me vendim të Këshillit të Ministrave janë akorduar fonde nën pretekstin e dixhitalizimit. Gjithashtu kompanitë pranë kryeministrit (bota oligarkëve të tij), është e pranishme në reklamimin e bizneseve të tyre, që në fund përkthehen në miliona euro dhe dhëna për televizionet private.
Kompanitë e madha e lenë haraçin pranë propaganduesve të kryeministrit nën kamuflimin e ligjshëm të marketingut. Në fund plotësohet pazëlli i një sistemi qeverisës që mbijeton nën ndikimin e parasë, pushtetit, ndarjes së pasurisë së vendit në duart e pak biznesmenëve oligarkë, mbrojtja e garantuar nga institucioni i prokurisë dhe në fund gjithçka mbyllet në ciklin e brendshëm me propagandën e madhe qeveritare.
