Prokuroria e Përgjithshme ka nisur verifikimet për kryebashkiakun e votuar në procesin e 30 qershorit, për Shkodrën, Valdrin Pjetri.
Reagimi i prokurorisë ka ardhur pak ditë, pasi Sekretari i Përgjithshëm i PD-së, Gazmend Bardhi, depozitoi në organin e akuzës kërkesën për verifikimin e pastërtisë së figurës së kryebashkiakut të dalë nga votimet e 30 qershorit.
Referuar, pretendimeve të PD-së, Pjetri është subjekt i ligjit të dekriminalizimit dhe ai nuk mund të kandidonte për kryebashkiak.
PD pretendon se Pjetri ka qenë i ndaluar dhe më pas i dëbuar nga Italia, ndërsa për të paktën 10 vjet, ai nuk ka hyrë në territorin Italian.
Kërkesa e PD-së është marrë në shqyrtim nga sektori i Dekriminalizimit në Prokurorinë e Përgjithshme, i cili do të kryejë verifikimet dhe më pas do të dalë me konkluzionet përkatëse.
Nga procedurat e deritanishme të aplikuara nga Prokuroria e Përgjithshme, në rastet e mëparshme, personat e dyshuar janë thirrur dhe u janë marrë shenjat e gishtërinjve, të cilat më pas i dërgohen shteteve ku ka dyshime se subjekti mund të ketë kryer një vepër penale, në rastin konkret Itali.
