Komisioni Qendror i Zgjedhjeve nuk ka mundur të zhvillojë mbledhjen pas kërkesës së partive opozitare, pasi komisionerët e Rilindjes dhe Sekretari i Përgjithshëm i këtij institucioni kanë nisur pushimet verore.
Kreu i KQZ-së, Klement Zguri, deklaroi se mbledhja nuk mund të zhvillohet për shkak të mungesës së kuorumit, pasi anëtarët e këtij institucioni kanë marrë lejet, sikundër edhe Sekretari i Përgjithshëm.
Partitë e opozitës iu drejtuan KQZ me një kërkesë lidhur me përgatitjet për mbajtjen e zgjedhjeve më 13 tetor, bazuar dekretit të Presidentit Ilir Meta. Edhe ky i fundit i ka bërë thirrje KQZ-së, pak ditë më parë, që të nisë përgatitjet dhe të mos pengojë mbajtjen e një procesi kushtetues dhe ligjor, ndërsa i cilësoi votimet e 30 qershorit si të parregullta, jo ligjore dhe jo kushtetuese.
Përfaqësuesi ligjor i LSI pranë KQZ-së, Muharrem Caka, tha se procesi i mbajtur në 30 qershor nuk mund të konsiderohet si kushtetues, pasi Presidenti ka anulluar me një dekret mbajtjen e zgjedhjeve në këtë datë.
“Ashtu sikundër është shprehur edhe zv.Ndihmës Sekretari amerikan i Shtetit, Gjykata Kushtetuese është i vetmi institucion që mund të interpretojë dekretin e Presidentit. Kjo do të thotë se asnjë institucion nuk mund të interpretojë një dekret që ka fuqi ligjore dhe është i detyrueshëm për t’u zbatuar”, tha përfaqësuesi ligjor i LSI.
Sipas tij, dekreti i Presidentit është në fuqi, dhe partitë e opozitës do të respektojnë Kodin Zgjedhor.
“KQZ duhej të niste procedurat lidhur me zgjedhjet në 13 tetor, bazuar në dekretin e Presidentit. Kërkesa është nënshkruar nga LSI, PAA dhe Partia Republikane.
Anëtarët e KQZ duhet të respektojnë Kushtetutën, betimin e tyre kur kanë marrë detyrën, dhe Kodin Zgjedhor”, tha ai.
Përfaqësuesi ligjor i LSI paralajmëroi ndërmarrjen e të gjitha hapave ligjorë ndaj një situate të tillë, që e konsideroi të qëllimshme nga anëtarët e PS në KQZ, me synim bllokimin e procesit të ligjshëm dhe Kushtetues zgjedhor më 13 tetor.
