Gjykata e Krimeve të Rënda caktoi masën e sigurisë “arrest në burg” për Lulzim Zalla dhe Klodian Estrefin, ndërsa detyrim paraqitje për Ergi Shullazin.
Tre personat u arrestuan pak ditë më parë, pasi dyshohet se kanë gjobitur një biznesmen nga Durrësi, të cilit i kishin kërkuar 50 mijë euro.
Por pretendimet e prokurorisë, janë mohuar nga avokatët e 3 të arrestuarve, duke mohuar që ata të kenë kërcënuar biznesmenin.
Mbrojtja pretendoi se kallëzuesi ishte ai që i kishte një shumë borxh dhe se nuk është kërcënuar në asnjë formë nga klientët e tyre për këtë shumë.
Prokuroria për Krime të Rënda pretendoi se duke qenë në dijeni të kërcënimit nga kallëzimi, janë kryer veprime stimuluese, duke bërë ndjekjen dhe arrestimin e tyre në momentin e marrjes së shumës prej 5 mijë euro.
Burime bënë të ditur se prokuroria ka edhe përgjime, një pjesë e këtyre janë paraqitur sot në kërkesën për masë sigurimi nga prokurori Behar Dibra.
Prokurori kërkoi ndryshimin e masës së sigurisë për një prej të arrestuarve, Ergi Shullazin, pasi në analizën e provave dhe fakteve të deritanishme nuk është e qartë nëse ky shtetas ka qenë i përfshirë.
