Nga Boldnews.al
Në një qebaptore ku mbante era mish i pjekur dhe rakie rrushi, që bashkohej me parfumin e shtrenjtë të ministreshës Elisë dhe ish-ministrit Arben, kryebashkiaku i ri i Kavajës u betua se do të punonte me ndershmëri. Nuk munguan edhe batutat plot “kripë” të elitës Rilindase dhe në fund, ky kryebashkiak, i zgjedhur me 11 % të votuesve, rendi drejt bashkisë.
Bum-bum me çekan, bam… një shkelm të fortë, dhe dera e bashkisë u shqye…! Duartrokitje nga Rilindasit, shkëlqim në sytë e ministreshës dhe në këtë mënyrë kryebashkiaku i ri u fut uzurpueshëm në atë institucion lokal.
Kështu ndodhi edhe në Bashkinë Devoll, ashtu edhe në shumë bashki të tjera të vendit si në Mat që e shpartalluan derën tërësisht. Kështu do të ndodhë edhe në bashkitë e tjera që drejtoheshin deri pak ditë më parë nga kryebashkiakët e djethtë. Të pakëta ishin ata kryabashkiakë të së djathtës që ia lëshuan zyrën me “çelsa në duar”, të cilët më shumë se të njihnin “fitoren e kundërshtarit”, thjesht i kursyen shkelmat dhe shkallmimin e dyerve, pasi Rilindasit e kanë ndarë mendjen: “me hir apo pahir do futen në çdo bashki”.
Si mund të qeverisë një drejtues lokal kur që ditën e parë të punës e nis me shqyerje, thyerje dhe shantazh? Përfundimi dihet, kur edhe këshillat bashkiakë janë të gjithë nën ngjyrat e PS-së. Kryerilindasi Edi Rama i konsideron: “Zgjedhje të lira, të ndershme dhe demokratike”, duke këmbëngulur se 30 qershori ishte një pikë e madhe kthese që ndan sipas tij paligjshmërinë nga ligjshmëria.
Ata që sot po varin kalaqafë rripin e kryebashkiakut, nuk i ngjajnë përfaqësuesve të zgjedhur, por një bande të fortësh në minorancë që tregojnë muskujt kudo që shkelin. Me sy të errësuar, kryebashkiakët e rinj po mbjellin terror dhe dhunë ndaj institucioneve që do i drejtojnë vetë, pa opozitë, pa një frymë kritike, por vetëm kokëbindur për çdo urdhër dhe nismë që vjen nga qeverisja qendrore.
I ngjajnë më shumë paraardhësve të tyre në vitin 1945, që pasi përfunduan luftën, me pushkë në krahë, uzurpuan çdo institucion, sekuestruan objekte dhe nxorën me dhunë nga shtëpitë kundërshtarët politik.
I gjithë gushti do të kalojë me këto pamje të trishta. Uzurpuesit e pushtetshëm lënë pas shkatërrim, terror dhe frikë që nuk mbyllet vetëm me shkallmimin e dyerve, por me instalimin e një diktature, nga pushteti lokal deri në atë qëndror.
Braktisja e zgjedhjeve të 30 qershorit nga opozita nuk e ndali çmendurinë Rilindase për tu futur e vetme në një proces votimesh, ku në më shumë se gjysmën e bashkive të vendit kishte vetëm një kandidat, ndërsa në të tjera u paraqitën kandidatë fiktiv, nën siglën e partizës Bindja Demokratike, të pjellë nga zyrat e Rilindjes, në kundërshtim me ligjin për regjistrimin e subjekteve politike.
Këtë proces absurd edhe OSBE/ODIHR e konsideron të paprecedent dhe nuk është në gjendje që të certifikojë këto zgjedhje, që vetëm të tilla nuk mund të quhen. Gjithashtu opozita vijon betejën e saj politike duke e konsideruar proces fars dhe që nuk përfaqëson vullnetin e lirë qytetar. Marrëzia qeverisëse po vijon me shfaqjen publike të kryebashkiakëve të rinj, apo të rizgjedhurve socialistë, që kanë nisur revanshin në tregimin e forcës dhe jo arsyes.
