Presidenti Ilir Meta e ka cilësuar 13 tetorin si datën e vetme për mbajtjen e zgjedhjeve vendore.
Meta në një konferencë për mediat tha se kriza ku ndodhet vendi nuk është thjesht vendore, por shumë më e gjerë.
“Më 30 qershor nuk kishim zgjedhje ligjore, data e vetme për mbajtjen e zgjedhjeve është 13 tetori, që është një ditë e detyrueshme për t’u zbatuar, është një datë ligjore dhe kushtetuese për mbajtjen e zgjedhjeve vendore.
KQZ duhej të merrte masat dhe të niste përgatitjet për zhvillimin e zgjedhjeve në këtë datë. Askush nuk duhet të ketë iluzione që çdo vendim i Gjykatës Kushtetuese mund t’i japë legjitimitet 30 qershorit.
Kushtetuesja është e vetmja gjykatë që mund të gjykojë mbi dekretet e Presidentit dhe çdo vendim i Gjykatës Kushtetuese lidhur me dekretet ka efekt për të ardhmen, jo për të shkuarën.
Ne nuk e kthejmë dot 30 qershorin e këtij viti që ka ikur si datë, ndaj 13 tetori është mundësia e vetme për mbajtjen e zgjedhjeve ligjore.
Nëse nuk bëhen zgjedhje më 13 tetor, të jeni të sigurtë që penalizimi për Shqipërinë nga BE për çeljen e negociatave do të jetë 101 %.
Ndaj ftoj Edi Ramën të reflektojë, të mos pengojë mbajtjen e zgjedhjeve më 13 qershor, apeloj forcat politike që duan të marrin pjesë në zgjedhje të regjistrohen, në një process ligjor”, tha Meta.
Sipas tij, me votimet e paligjshme të 30 qershorit, ne kemi zero mundësi për hapjen e negociatave.
“Në mendjen time ekziston vetëm një datë, 18 tetori, se e kanë vendosur të tjerë, ajo që ne kemi vendosur bashkë është që Shqipëria të bëhet si gjithë Evropa.
Nuk është ashtu si ka deklaruar Hahn që 80% e shqiptarëve e përkrahin këtë, por 100% e shqiptarëve.
Është edhe një ditë provimi se integrimi është cështje standardesh dhe jo dëshirash. Unë insistoj të evitoj përshkallëzimin e kësaj krize që ndërkohë vazhdon, sqaron se në 30 qershor nuk ka pasur zgjedhje shtetërore.
Zgjedhjet e ligjshme janë në 13 tetor. Kriza nuk është thjesht vendore, por shumë më e madhe se qytetarët më shumë ndjejnë efektet e qeverisjes vendore se ato qendrore. Është një krizë më e thellë dhe në angazhimet e mia për të ndihmuar vendin për një zgjidhje më të plotë kam theksuar se 13 tetori mund të shërbente nëse do kishte vullnet nga kryeministri në radhë të parë e maxhoranca dhe opozita e të gjithë llojeve, nga presidenti që është akuzuar nga lidershipi i maxhorancës, si faktor kontribues i kësaj krize sipas tyre që ti jepni mundësi shqiptarëve të votonin për pushtetin vendor, Kuvendin që nuk mendoj se është në situatë normale, edhe për presidentin, meqë ka pretendime nga lidershipi i PS, që dihet se ka qenë mbështetësja ime kryesore për zgjedhjen time në këtë detyrë”, tha Meta.
