Trajneri i Partizanit, Franko Lerda, e ka cilësuar të turpshëm gjykimin e sotëm nga kroati Pajac që i kushtoi të kuqve eliminimin nga Liga e Europës.
Ai akuzoi direkt gjyqtarin që kishte ndikuar në fatin e ndeshjes në vendimet e tij.
“Kjo është gjëja më negative absolutisht në futboll. Mund të humbësh e fitosh ndeshje, por në këtë mënyrë të shqetëson shumë”, tha Lerda para gazetarëve në fund të ndeshjes.
“Jemi vend i vogël dhe ndodhin këto raste të dyshimta që na ndëshkojnë. Gjyqtari o duhet të ngrejë flamurin ose jo, nuk ka asgjë për të ndryshuar vendimin. Është e kotë të flasim për rezultat. Komplimente djemve, edhe atyre në pankinën e tribunë se kanë bërë gjithçka si duhet. Kemi qenë bashkë, kemi dhënë maksimumin dhe mund të merrnim diçka më shumë”, vijoi ai.
“Te episodi fola me gjyqtarin e katërt dhe e pyeta pse u ndryshua vendimi. Sapo pësuam golin pashë vijërojtësin që kishte çuar flamurin dhe isha i qetë. Por ata e ndërruan vendimin dhe nuk kishte si ta shihnin e merrnin vendim ndryshe. Ky është turp, është e turpshme. Nesër kalon gjithçka, por klubi ka pësuar një dëm të madh”, tha Lerda.
I pyetur nga “Vip Sport” për paraqitjen e ekipit, ai u shpreh pozitivisht për lojën.
“Djemve nuk mund t’u them gjë tjetër, kemi bërë tre ndeshje ne lartësinë e duhur, kanë mbajtur lart figurën e Partizanit. Nuk mund ta quaj katastrofë ndeshjen e parë ndaj Sherif në Tiranë, të gjithë kanë bërë mirë. Të jenë krenarë, shumë krenarë se kemi dalë me kokën lart. Nuk e meritonim këtë eliminim. Duhet të duartrokasim të gjithë djemtë, se kanë bërë çdo gjë që ishte në mundësitë tona”, deklaroi Lerda.
