Kryetari i PD-së, Lulzim Basha, ka reaguar lidhur me situatnën në Devoll, ku kryebashkiaku i Rilindjes, Eduard Duro, pasi ka hyrë në zyrë, ka urdhëruar rrethimin e institucionit me polici.
“Pushteti i paligjshëm i 6% po uzurpon me dhunë qeverisjen lokale, kundër vullnetit të popullit. Ky regjim kriminal dhe plaçkitës po hyn në rrugën e verbër të përplasjes me popullin e tij”, shkruan Basha në një postim në rrjet.
Kreu demokrat thekson se hajdutët në pushtet ndjehen të mbrojtur se kanë polici speciale, gaz lotsjellës dhe mercenarë, por nesër do të kenë fatin që meritojnë hajdutët dhe banditët.
Mbi 30 forca policore kanë rrethuar Bashkinë e Devollit me kërkesë të Duros, kryebashkiak i dalë nga votimet e 30 qershorit, të cilat nuk njihen nga opozita dhe nga Presidenti Ilir Meta.
Ndërkohë Bledion Nallbati, kryebashkiaku i opozitës, ka deklaruar se ai është legjitim në detyrë, deri në zhvillimin e zgjedhjeve ligjore. Mbështetës të opozitës prej orës 08:00 protestojnë para bashkisë Devoll, e cila mbrohet nga policia dhe FNSH.
