Nga Boldnews.al
Më 2 Korrik 2019, Gramoz Ruçi u gjend i papërgatitur, kur opozita e re parlamentare kërkoi të mbahej 1 minutë heshtje për “Dëshmorët e demokracisë”, të vrarë nga forcat e sigurisë saktësisht 28 vjet më parë, në kohën kur kryeparlamentari i sotëm ishte Ministër i Brendshëm.
Në karrierën e tij të gjatë politike, Ruçi është përballur shpesh me akuzat e të djathtës si urdhëruesi i vrasjes se Arben Brocit, Bujar Bishanakut, Nazmi Kryeziut e Besnik Cekës, gjatë një proteste anti-komuniste në Shkodër, në fillimin e prillit 1991.
Megjithatë, ndaj tij nuk ka pasur asnjë akuzë zyrtare për atë ngjarje, të ndodhur në qytetin verior në ditët e fundit të regjimit komunist në Shqipëri.
Ruçi është munduar ta shmangë përballjen me këtë ngjarje. Por, në përvjetorin e 28-të, para pak muaj, ai u detyrua të respektojë heshtjen solemne, pas një kërkese të pa diskutuar paraprakisht, nga deputetja Rudina Hajdari.
E, për të shmangur kërkesa të tilla të papritura në të ardhmen, shumica socialiste në Parlament ka gjetur zgjidhjen.
Në ndryshimet e fundit të Rregullores së Parlamentit, e cila është botuar në Fletoren Zyrtare të Premten e kësaj jave, socialistët kanë modifikuar nenin 7, në të cilën tashmë parashikohet: “Kryetari i Kuvendit, në këshillim me kryetarët e grupeve parlamentare, vendos për propozime të deputetit/deputetëve për të mbajtur heshtje solemne në seancë plenare”.
Në këtë mënyrë, kryetari i Parlamentit dhe kolegët e tij partiakë, synojnë që të shmangin “surpriza e pakëndshme” që mund të vijnë nga “opozitarët e rinj”, në rastet e kërkesave të paparashikuara për “heshtje solemne”.
Për të qenë më të qetë edhe në këtë aspekt, Ruçi dhe socialistët e tij kanë vendosur që të menaxhojnë situatën, duke përcaktuar në Rregullore se “heshtjet solemne” do të miratohen, vetëm pasi ato të jenë diskutuar paraprakisht në zyrën e Kryetarit të Kuvendit.