Diskutimeve për çështjen e Teatrit Kombëtar i është bashkuar edhe gazetari Blendi Salaj, i cili shpreh një qëndrim të qartë dhe një jep një mesazh për kryeministrin.
Duke u ndalur te një ndodhi në Londër, Salaj, në faqen e tij në Facebook, shkruan: “Londër, 16 Korrik 2019 – Kryetari i bashkisë së Londrës, z Sadiq Khan ka hedhur poshtë projektin për ndërtimin në qendër të “Tulipanit”, një kulle ultramoderne e cila me 305 metra lartësi do ishte më e larta në kryeqytetin anglez.
Kryetari e shfuqizoi vendimin për t’i dhënë lejen projektit pasi disa shqetësime u ngritën rreth cilësisë së dizenjimit dhe dëmit që do i shkaktohej panoramës së qytetit.
Kundërshtimi kryesor erdhi nga Pallatet Historike Mbretërore që thanë se ‘Tulipani’ do ta bënte Kullën historike të Londrës ‘të dukej si një kështjellë lodër.’ – The Independent”.
Në fund, e mbyll me një mesazh për kryeministrin Edi Rama: “PS. Përqafoje progresin. Vidh pak, në mundsh, nga sqima angleze”.
Debati për Teatrin ka nisur që prej fillimit të vitit të shkuar, kur qeveria bëri të njohur projektin për shembjen e tij dhë ndërtimin e një godine të re, pas së cilës qëndron një projekt i paracaktuar për një kompleks ndërtimesh shumëkatëshe që do të ngrihen nga kompania private “Fusha”. Qeveria ka këmbëngulur gjatë gjithë kohës se projekti ka qenë një ofertë e pakërkuar e kompanisë “Fusha”, me pretendimin se ajo ka një pjesë të pronësisë mbi truallin, ndonëse jo më shumë se tre përqind. Por faktet kanë dëshmuar se ajo ka qenë një ofertë e koordinuar më parë me qeverinë e cila fillimisht paraqiti një ligj të posaçëm i cili u kritikua dhe nga Komisioni europian, për shkak se proejkti shmangte një garë të hapur. Socialistët bënë më pas ndryshime në ligj, duke vendosur hapjen e një gare, por e gjitha duket të jetë vetëm në letër, pasi asnjë konkurrent tjetër nuk plotëson të paktën kushtin që të marrë miratimin e të gjithë pronarëve të truallit, pasi i duhet të marrë leje dhe nga kompania “Fusha”. /BN/
