Ndihmës Sekretari amerikan për Evropën dhe Euroazinë, Philip Reeker, ndodhet në një vizitë në Maqedoninë e Veriut, ku u takua me kreun e qeverisë Zoran Zaev. Hapja e negociatave me BE-në në tetor, lufta kundër terrorizmit dhe anëtarësimi i vendit në NATO, ishin temat kryesore të një takimi që u përshkrua nga mediat, si shumë i ngrohtë.
“Maqedonia e Veriut ka mbështetjen e plotë të SHBA-ve dhe të Sekretarit Pompeo personalisht. Ju dhe vendi keni shansin më të mire tani për të vazhduar rrugën drejt integrimit në BE. Ekonomia rritet dhe këtë e tregojnë shifrat, progresi është i vërtet”, deklaroi nga Shkupi Reeker.
Diplomati amerikan lëshoi një mesazh edhe për opozitën e këtij vendi, duke theksuar se ajo duhet të jetë pjesë e procesit të anëtarësimit të vendit në NATO dhe në hapjen e negociatave.
Nga ana tjetër kryeministri Zaev u shpreh se tetori është një moment i cili nuk duhet humbur për hapjen e negociatave.
“Në tetor vendi ka shansin më të mirë për të hapur negociatat me BE-në. Tashmë 21 vende anëtare të NATO-s kane protokolluar anëtarësimin dhe deri në shtator, ose tetor maksimumi, do te kenë protokolluar të gjithë vendet anëtare të NATO-s”, tha Zaev.
Fillip Riker do të takohet në vazhdim të kësaj vizte, edhe me presidentin Stevo Pendarovski dhe me kryetarin e Kuvendit, Talat Xhaferi.
Para vizitës në Shkup, Reeker qëndroi në Athinë, ku pati takime me shefin e diplomacisë greke, Nikos Dhendhias, me përfaqësues të tjerë qeveritarë, si dhe me ish-kryeministrin, Aleksis Cipras.
