Aktori Guljelm Radoja, i pozicionuar që në krye të herës kundër shembjes së Teatrit Kombëtar, i është bashkuar artistëve dhe qytetarëve në protestën e kësaj të enjteje.
Duke këmbëngulur që kauza e Teatrit të mos politizohet, ai u bëri thirrje kolegëve që të ruajnë dinjitetin e tyre, “pavarësisht natyrës së brishtë ta artistëve, ndonjëherë edhe të manipulueshme”.
“Një nga kolegët e mi i tha dikujt se ‘unë shkela mbi dinjitetin tim’. Pse shkele? A ka gjë më të madhe se dinjiteti? Secili prej nesh kur lan faqet në mëngjes shikon veten dhe thotë një fjalë: Ç’bëra dje?! Sa dinjitoz qesh dje. Pse isha qesharak dje, dhe lashë të shkelet mbi dinjitetin tim. Për çfarë? Përse u shite miku im?! Përse u shite kolegu im? Çfarë pakti bëre me djallin që shkele mbi dinjitetin”, tha aktori.
Në media, është interpretuar se mesazhi i Radojës i drejtohet pikërisht aktorit Robert Ndrenika. Ndrenika fillimisht u shpreh publikisht kundër shembjes së Teatrit, por më pas ndryshoi qëndrim. Qasja e re u përdor nga kryetari i bashkisë Tiranë Erion Veliaj, për të propaganduar se shembja e Teatrit Kombëtar, është pozitive.
