Nga Boldnews.al
Anëtari i Këshillit të Lartë të Prokurorisë dhe ish-prokurori i Krimeve të Rënda, Gentian Osmani, ka mohuar që të ketë pasur njohje dhe komunikime miqësore me “dëshmitarin e rremë”, Fredi Alizoti.
Osmani ka drejtuar hetimin e dosjes “Geron Xhafaj”, në të cilën Policia dhe Prokuroria përdorën dëshminë e dyshimtë një personazhi problematika, Alizoti, për të rrëzuar deklarimet e shtetasit Albert Veliu, i cili e përfshinte vëllain e ish-ministrit të Brendshëm, Fatmir Xhafaj, në trafik narkotikësh.
I cituar nga disa media on-line, Gentian Osmani ka mohuar se ka njohje me Alizotin, në vijim të publikimit nga ish-deputeti demokrat, Ervin Salianji, të disa përgjimeve proceduriale, ku ai komunikon në telefon me “dëshmitarin e rremë”, gjatë kohë që po zhvillohej hetimi.
Osmani citohet të thotë se “në mënyrë absolute, nuk ka asgjë miqësore në atë bisedë. Për më tepër, nëse do të kishte vijuar, mund të përfundonim edhe në komunikim jo-etik”.
Por, si qëndron e vërteta dhe përse prononcimi i prokurorit Osmani nuk përputhet aspak me realitetin?
Në pasazhin audio të publikuar nga Salianji, rezulton që dëshmitari i rremë, Fredi Alizoti, telefon prokurorin Gent Osmani, ku i kërkon të takohen “5 minuta”. Prokurori Osmani, në dijeni të faktin se Alizoti ishte në përgjim, pasi e kishte firmosur vetë urdhërin për këtë gjë, komunikon ftohte.
Osmani i kërkon Alizotit që të mos e thërresë në emër, “Genti”, por t’i drejtohet “prokuror Genti” dhe “të paraqitet nesër në orën 10, në zyrën e tij, së bashku me kartën e identitetit”.
Ky përgjim, i parë në kontekstin e plotë të dosjes hetimore, rezulton që nuk është “aq i pafajshëm”, sa ç’përpiqet ta paraqesë Gentian Osmani.
“Boldnews.al” ka parë dosjen hetimore, në të cilën rezulton se kërkesa e prokurorit Osmani drejtuar Alizotit për t’u paraqitur të nesërmen në zyrën e tij, nuk është “plotësuar”.
– Në aktet e dosjes nuk ka asnjë akt apo proces-verbal që të dokumentojë se Fredi Alizoti ka qenë në Prokurorinë për Krime të Rënda, dhe aq më tepër në zyrën e prokurorit Osmani, një ditë pas atij komunikimi.
Madje, Fredi Alizoti rezulton që nuk ka qenë për shumë kohë më pas në zyrën e prokurorit Osmani, deri ditën që ai u arrestua, si i dyshuar për “kallëzim të rremë”.
– Gjithashtu, audio e bisedës Alizoti-Osmani, sipas gjendjes së saj në dosjen hetimore, rezulton të jetë e fshirë. Biseda e publikuar nga Salianji, e cila është e njëjtë me dosjen e prokurorisë që ka verifikuar edhe “Boldnews.al” ka një shkëputje të pakuptimë, e cila krijon dyshimet se mbi atë material ka ndërhyrje nga prokuroria, para se materiali t’u dorëzohej të pandehurve.
Pikërisht, në bazë të këtyre të dhënave të dosjes, krijohet dyshimi i fortë se “ftesa” që prokurori Osmani i ka bërë në telefon Alizotit për t’u paraqitur “nesër në orën 10” është një manovër për të mos lënë të dokumentuar në përgjime raportin ndërmjet të dyve.
Audio-përgjimi Fred-Alizoti-Gentian Osmani u publikua, të Mërkurën, pak pasi ish-deputeti Ervin Salianji ia vuri materialin në dispozicion Kolegjit të Posaçëm të Apelimit, i cili po shqyrton kërkesën e Komisionerit Publik për shkarkimin nga detyra të anëtarit të Këshillit të Lartë të Prokurorisë.
