Lakmisë për të ndërtuar pa leje nga autoritet nuk i ka shpëtuar as një nga këshilltarët më të rinj të Bashkisë Sarandë të dalë nga zgjedhjet lokale të 30 qershorit. Por, ndërsa punonjësit e Inspektoratit Ndërtimor Urbanistik Vendor të Bashkisë Sarandë, shkuan për të shembur një mur që Sinan Ahmeti, 52 vjeç, kishte ndërtuar pa leje për të rrethuar banesën e tij, ky i fundit është konfliktuar me inspektorët e INUV-it.
Madje, gjatë përleshjes fizike, Ahmeti ka goditur me levë në kokë një prej inspektorëve. 52-vjeçari ka pretenduar se ndërtimin e murit e ka bërë me leje dhe se INUV nuk kishte të drejtë t’ia shembte.
Në mbështetje të inspektorëve shkoi Policia Bashkiake, ndërsa Policia e Rendit mbërriti në vendin e ngjarjes pas marrjes së njoftimit se kishte përleshje. Pronari i banesës së rrethuar me këtë mur Sinan Ahmeti ka kundërshtuar me dhunë, madje ka goditur me levë inspektorin e INUV, Tonin Simoni, duke pretenduar se kishte dokumentacionin e duhur dhe se ishte në rregull me ligjin për ndërtimet.
Policia, e cila është ndodhur menjëherë në vendngjarje ka shoqëruar autorin, ndërkohë që inspektori i INUV ka marrë mjekimin në spital, si dhe është këqyrur edhe nga mjeku ligjor. Pas shoqërimit në Komisariatin e Policisë në Sarandë të 52-vjeçarit Ahmeti, inspektorët e INUV kanë vijuar procesin e shembjes së murrit rrethues që i ndaluari kishte ngritur pranë banesës së tij në Ksamil.
Autori i shoqëruar nga Policia, Sinan Ahmeti, figuron në listat e këshilltarëve të dalë nga zgjedhjet e 30 qershorit nga Partia Socialdemokrate. Ai ka marrë zyrtarisht mandatin e anëtarit në Këshillin e ri Bashkiak të Sarandës nga Komisioni Qendror i Zgjedhjeve. Përveç angazhimit në politikë, 52- vjeçari rezulton se është gjithashtu dhe pjesë e muzikës polifonike.
