Nga Boldnews.al
Ramush Haradinaj deklaroi sot dorëheqjen nga posti i Kryeministrit, pasi Gjykata e Hagës e thirri për ta marrë në pyetje.
Dorëheqja e Haradinajt vjen në një kohë kur një ditë më parë u raportua se vellai i tij u ndalua në Vienë sipas një urdhëri arresti serb, ndërsa Edi Rama u shfaq në krah të Erdogan, duke drekuar në rezidencën e Presidentit turk.
Haradinaj pak javë më parë u përfshi në një debat publik, me Edi Ramën, lidhur me planin për ndryshimin e kufinjve mes Kosovës dhe Serbisë, ndërsa më herët, ai kundërshtoi ashpër rrëmbimin e 6 shtetasve turq, duke hyrë në përplasje me Erdogan, që akuzonte të arrestuarit në Kosovë si pjesë e pucit kundër tij.
Në të dy rastet Haradinaj është munduar të mbrojë Kosovën dhe imazhin e saj. Dhe në të dy këto përplasje të forta të Haradinajt, veçanërisht përsa i takon skenarit të kufinjve, Edi Rama nuk ka qenë në krah të tij. Në rastin e kufinjve, Rama u bë me të gjithë, vetëm me Haradinajn jo. Ai u shfaq në Berlin shumë më i afërt me Vuçiç dhe kryeministren e Serbisë se sa me Haradinajn.
Dhe nëse i referohemi deklaratave të kryeministrit në ikje të Kosovës, ai kishte ushtruar presion ndaj tij për të pranuar planin për ndryshimet e kufinjve. Haradinaj në përballjet që ka pasur kundërshtar më të fortë më shumë ka pasur Ramën dhe Hashim Thaçin, sesa bie fjala Aleksandar Vuçiç apo kryeministren serbe.
Ndoshta koha kur Haradinaj ishte Kryeministër në Kosovë, dhe Edi Rama në Shqipëri, do të mbahet mend për “thikat pas shpine” që kreu i qeverisë në Shqipëri, i ka futur Haradinajt në Kosovë. Nëse i referohemi deklaratës së kryeministrit në detyrë të Kosovës, ai tha se bashkë me forcën e tij politike do të hyjë në zgjedhje. Kjo tregon se largimi i tij si kryeministër, përveç një gjesti fisnik, tregon edhe angazhimin e faktorëve kundër tij, brenda dhe jashtë Kosovës, për të nxjerrë jashtë loje, qoftë edhe përkohësisht nga vendimmarrja Ramush Haradinajn.
Pothuajse të njëjtën skemë përdori edhe Edi Rama kur largoi Ditmir Bushatin, që pati një tjetër qëndrim lidhur me skenarin për ndryshimin e kufinjve, me atë të artikuluar nga Edi Rama. Dhe po të kihet parasysh fakti se Rama komandoi në krye të diplomacisë Gent Cakajn, i konsideruar si mbështetës i Thaçit, duket se i gjithë fjalëkryqi që çoi doreheqjen e Haradinajt parapërgatitej prej muajsh.
Ramushi sot ndërmorri aktin fisnik të dorëheqjes në mbrojtje të imazhit të Kosovës, një standard që vështirë se do të mund të aplikohet nga Edi Rama. Ndoshta kjo është arsyeja që Ramushi dhe Edi janë kaq të largët me njëri-tjetrin.
DENONCO