Sezoni turistik veror në qarkun e Korçës është shoqëruar edhe me ardhjen e turistëve e vizitorëve të shumtë të cilët kanë përdorur pikat kufitare të Kapshticës, Qafë Thanës dhe Tushemishtit për të hyrë në vendin tonë.
Vetëm në dy javët e fundit kanë hyrë nga këto tri pika kufitare 107 306 persona shqiptarë dhe të huaj, ndërsa janë shënuar edhe 100 496 dalje nga Republika e Shqipërisë drejt Greqisë dhe Maqedonisë së Veriut përmes këtyre tri pikave kufitare.
Një gjë e tillë është bërë me dije nga burime zyrtare pranë Drejtorisë Vendore të Policisë së qarkut të Korçës.
Të njëjtat burime thanë se gjatë kësaj periudhe fluksin më të lartë të lëvizjeve e ka pika kufitare e Qafë Thanës me 94 292 hyrje dalje. Ky fluks në rritje sipas burimeve lidhet me faktin se shqiptaro maqedonasit kalojnë kryesisht fundjavën në bregdetin shqiptar, raporton Vizion +.
Fluks i lartë është regjistruar gjatë dy javëve të fundit edhe në pikën e kalimit kufitar të Kapshticës me 89 719 shtetas shqiptarë e të huaj që kanë hyrë e kanë dalë.
Ajo që të bën përshtypje, ndryshe nga viti i kaluar në të njëjtën periudhë hyrjet e daljet në dy javët e fundit janë pothuajse të njëjta, çka tregon se edhe një pjesë e mire e shqiptareve kanë zgjedhur Greqinë për të kaluar pushimet.
Fluksin më të pakët të lëvizjeve në të dy anët e kufirit me Maqedoninë e Veriut e ka pasur pika e kalimit kufitar të Tushemishtit me 23 791 shtetas shqiptarë dhe të huaj. Nga ana e Drejtorisë Vendore të Kufirit dhe Migracionit janë marrë të gjitha masat për të përballuar fluksin e lëvizjeve në të tri këto pika të kalimit kufitar duke shmangur radhët dhe duke shtuar numrin e sporteleve në varësi të fluksit të paraqitur.
Të njëjtën gjë kjo drejtori i ka kërkuar edhe autoriteteve kufitare greke dhe maqedonase.
