Nga Boldnews.al
Në pragun e marrjes së pushtetit ekzekutiv, pasi atë lokal e kishte shtrydhur me kohë, Edi Rama u shpreh në një intervistë të çiltër se kishte ndërment të bënte shtet dhe jo mbante pushtet, duke synuar të futet në librat e historisë e të mbahej mend gjatë për mirë.
Pas gjashtë vitesh qeverisje, ai ka kapërcyer çdo imagjinatë, duke u futur në librat e historisë, por në ato që njihen si “librat e zinj”. Kanabizimi i vendit, futja në parlament e vrasësve, trafikantëve dhe grabitësve të dhunshëm, padyshim që e futën Ramën në histori.
Abuzimi me pushtetin, në shpikjen e PPP-ve, apo konçensioneve, gjithashtu kërkojnë një studim të thelluar sesi një shtet nuk duhet të veprojë. Detyrimi i rreth 500 mijë shqiptarëve për të emigruar, ia zunë disa kapituj në historinë e trishtë shqiptare. Uzurpimi i çdo pushteti të pavaruar, të çon automatikisht drejt “librit të zi”.
E pasi i ka arritur të gjitha këto batërdi, Rama tashmë kërkon të pastrojë veten. Por në çfarë mënyre? Do bëhet më i mirë? Do heqë dorë nga pushteti absolut? Nuk do ketë më lidhje me trafikantë e kriminelë që grabisin vota për pushtetin e tij? Nuk do të fusë duart në arkën e shtetit në të famshmin korrupsion? Asnjëra nga këto! Rama nuk mund të dalë më nga vetja, pasi edhe nëse do, është bërë aq llum, sa pjesa tjetër e zhytur në pisllëkun e së keqes, po aq sa ai, nuk e lënë më. Atë e ka kapur krimi dhe pushteti që ngriti vetë.
Rama do ikë, por me largimin e tij për ironi të madhe, do bëhet edhe më keq. Ai do na vrasë të gjithëve shpirtërisht në mënyrë graduale. Do ia lërë partinë në duart e Erion Veliajt, e nëpërmjet saj mund ta synojë edhe qeverinë. Ky do jetë ndëshkimi më i madh në ikjen e tij. Dhe këtë do e bëjë vetëm për një qëllim: “Që njerëzia pas disa vitesh, të thotë: “Ishte më i mirë Rama, ky na mori dinjitetin, na krijoi një botë surreale, na vrau me propagandë, i hoqi shqisën e të menduarit fëmijëve tanë”. Paska edhe më keq…
Kështu Rama do krekoset si një njeri që da nisë të pastrohet nga libri i zi i historisë, kur krahasimi do bëhet me Veliajn. Shenjat janë dhënë që tani, ku në Rilindje (jo më Partinë Socialiste), pasi ajo ka vdekur politikisht prej kohësh, Lali Eri po pompohet si lider. Një krijesë e re, pa të ngjashëm në botë, mund të marrë në duar të gjithë vendin. Populli nuk do mendojë më, por mund të kthehemi në një laborator të madh eksperimental, i ngjashëm me kampet naziste, ku nuk të vrisnin, por në çdo çast të bombardonin me propagandë.
Pas disa muajsh eksperiment me propagandë, mbledhje dhe injektim të botës surreale, disa nisën të besonin atë që thuhej, të tjerë u çmendën, e të tjerë humbën sensin e të menduarit, traumë të përjetshme.
Lali do shuajë elitat, do tërheqë pas vetes ato fëmijët e kopshteve apo shkollave të sotme, që nesër do jenë rini. E tmerrshme, e rëndë, sepse ajo po ndodh ndërkohë. Sot në Tiranë nuk ka një fëmijë kopshti apo shkolle që nuk e njeh Lali Erin. Ai të paktën një herë ka qenë në shkollën e tyre, ata e takuan me çiltërsi, stampuan një foto për kujtim dhe me këtë Lalin e sotëm, do bëhen “idhtarë” të tij të nesërmen…! Fundi i një traume do të vijë, atëherë kur të mendohet e keqja nuk paska fund. Edi ishte më i mirë se Eri…!
