Astrit Patozi, i cilësuar nga opozita si “paterica” e Edi Ramës në votimet e 30 qershorit, i është përgjigjur kryedemokratit Lulzim Basha lidhur me vendimin e gjykatës së Durrësit.
Këtë të mërkurë, gjykata e Durrësit i konsideroi të pavlefshme zgjedhjet lokale të zhvilluara në këtë qytet, në 30 Qershor, duke refuzuar t’i japë mandatin kandidates së Partisë Socialiste, Valbona Sako. Në vendim, gjyqtarja Mimoza Margjeka konstaton se Komisioni Qendror i Zgjedhjeve ka regjistruar si pjesëmarrëse në procesin e votimit subjektin politik “Bindja Demokratike” të Astrit Patozit, me anën e një akti absolutisht të pavlefshëm. Për pasojë, edhe votimet u cilësuan të pavlefshme.
Vendimin e Gjykatës së Durrës e përshëndeti kreu i PD Lulzim Basha.
“Farsa e 30 qershorit ishte masakër e Kushtetutës, e ligjit dhe e standarteve. Dua të përshëndes vendimin e Gjykatës së Durrësit, i cili sjell shpresë se në këtë vend ka gjyqtarë e gjyqtare që e kanë të shenjtë Kushtetutën dhe ligjin, se ka shërbyes civilë me kurajo dhe ndërgjegje që i shërbejnë shtetit të së drejtës dhe jo shtetit partiak. Farsa e 30 qershorit është një grusht kriminal institucional i Edi Ramës, përmes të cilit ai uzurpoi pushtetin vendor, por edhe KQZ-në dhe gjithë sistemin e administrimit të zgjedhjeve përfshi kolegjin zgjedhor. Të gjithë ata që u bënë pjesë e këtij grushti kriminal institucional, të gjithë ata që i shërbyen Edi Ramës për të dhunuar Kushtetutën dhe ligjin me 30 qershor, do të përgjigjen para drejtësisë për veprimet e tyre kriminale”, shkroi Basha në një postin në Facebook.
Më vonë erdhi edhe reagimi i Patozit. “O fol e mba, o dh.. e ha”, i drejtohet Patozi-Bashës, duke përdorur një gjuhë vulgare, siç rëndom e kemi dëgjuar nga kryeministri Edi Rama.
Në një postim në Facebook, Patozi shkruan:
“NDAJE MENDJEN, O JURIST!
Eh, mor jurist, që nuk e tregon diplomën, megjithëse ta kanë bërë çështje prej shumë kohësh shkollimin tënd në Holandë! Qenke gëzuar për një vendim gjykate në Durrës, ndërkohë që po të kishe formimim elementar për atë, që pretendon se je arsimuar, duhet t’i njohësh të gjitha vendimet e institucioneve, jo vetëm ato që të pëlqejnë ty.
Ka një anekdotë me qershitë, për dikë që i ndante në të bëra pis ose jo. Dhe në fund i hëngri të gjitha, ngaqë i dukeshin të pastra edhe ato që kishin ngelur të fundit.
Sepse ka dhjetëra vendime të tjera gjykatash të cilat ti nuk i pranon, se nuk të interesojnë.
Por unë ta njoh hallin dhe nuk të vë shumë faj. Ti thjesht po shtyn ditët e tua, derisa të dalë një gjë tjetër e të harrohet fakti që i fale kundërshtarit 61 bashkitë pa betejë, kur u the njerëzve që zgjedhje vendore pa ty në Shqipëri nuk do të ketë.
E nise këtë punë me gënjeshtrën që BINDJA DEMOKRATIKE mori pjesë në procesin e 30 qershorit për të legjitimuar fitoren e Edi Ramës. Tani e paske ndërruar pllakën e gramafonit dhe po thua që ne ishim në këto zgjedhje për të deligjitimuar procesin.
Ka një shprehje të Shqipërisë së Mesme, që të shkon shumë në këtë rast: ‘O fol e mba, o dh.. e ha’.
Kaq për sot…Sepse unë nuk kam ndërmend të komentoj një vendim gjykate, sado i çmendur apo i porositur nga ndonjë kamikaz i dëshpëruar si ty që të më duket”.
