Taulant Balla është caktuar koordinator i PS-së për qarqet Durrës, Elbasan e Korcë. Sipas organizimit të ri në PS, Niko Peleshi, ish-zv.kryeministër dhe një nga të besuarit e kryeministrit Rama në mandatin e parë të qeverisjes së tij, do të raportojë te Taulant Balla.
Të njëjtën gjë do të bëjë edhe Vangjush Dako dhe Blerina Gjylameti, që janë drejtues politik në qarqet Durrës dhe Elbasan.
E ndërsa Elbasanin, prej kohësh e drejton Balla, si deputet i Librazhdit, duket se ndikimi i numrit dy të socialistëve, do të shtrihet deri në Korçë, atje ku ndikimi i Niko Peleshit ka qenë absolut.
Peleshi, fillisht si Prefekt dhe më pas si kryebashkiak dhe deputet i PS-së, ka drejtuar fushatat e PS-së në qarkun e Korçës, për të paktën 15 vitet e fundit.
Por së fundmi, ish-zv.kryeministri, i cili u largua nga kabineti qeveritar, ashtu si edhe, Arben Ahmetaj, Lindita Nikolla apo Ditmir Bushati, konsiderohet si një ndër “rebelët” në rradhët e Rilindjes.
Dhe duket se paralajmërimet e bëra më herët lidhur me hatërmbetjet apo përplasjet mes ish-ministrave dhe kreut të PS-së, Edi Rama, kanë bërë që ky i fundit të vendosë veton dhe të emërojë Taulant Ballën si koordinator për 3 qarqe, përfshi edhe atë të Korçës.
Ndërkohë që Ditmir Bushati do të raportojë te Edi Rama, që është vetëcaktuar si koordinator i veriut, Peleshit do t’i duhet të raportojë te Taulant Balla, Sekretar i Përgjithshëm dhe kreu i Grupit Parlamentar të PS-së. /Boldnews.al/
