Qëndrimet e kryeministrit Edi Rama dhe opozitës vijnë të jenë të kundërta për sa i përket 30 qershorit dhe pasojat e atyre votimeve. Kryeopozitari Lulzim Basha ka artikuluar se votimet janë “nul” dhe se kryebashkiakët e opozitës do të qëndrojnë në detyrë. Ndërsa Rama, këtë të hënë foli për atë ç’ka sipas tij, do të ndodhë në bashkitë e djathta.
Rama tha se në çdo bashki që deri dje është qeverisur nga e djathta “do ndërtojmë një proces solid në raport me administratën”.
“Do ta çojmë në një nivel tjetër Partinë Socialiste, në funksion të harmonizimit të linjës sonë politike me mirëfunksionimin e bashkive dhe padiskutim edhe në funksion të një qëndrimi të qartë që e kemi mbajtur edhe gjatë fushatës. Në çdo bashki që deri dje është qeverisur nga e djathta për të ndërtua një proces solid, për të mos shfaqur asnjë tendencë tradicionale prej pushtuesish në këto bashki, për të respektuar të gjithë ata që sot punojnë në këto bashki, për të mos prekur asnjë grua apo vajzë në radhë të parë që figuron në administratën bashkiake dhe për të pasur transparencë maksimale për të gjitha lëvizjet që mund të jenë të nevojshme jo në funksion të diskriminimit apo spastrimi politik, por meritës për çdo pozicion”, tha Rama, në një prononcim për gazetarët pas mbledhjes së kryesisë së PS-së, nga e cila doli data për zhvillimin e Asamblesë: 22 Korriku.
Kreu i qeverisë mohoi se të ketë ndryshime në qeveri. Mohoi gjithashtu mundësinë për zgjedhje të parakohshme.
I pyetur lidhur me opozitën dhe një negocim të mundshëm më të, Rama u shpreh se: “Ata do të ndëshkohen nga vet përjashtimi dhe në procesin e vetëvrasjes do të bërtasin ‘fitore’ dhe siç e shikoni po e bëjnë. Fitore të tilla paçin gjithmonë, po ajo që mbetet është rezultati i sovranit”.
Ndërsa lidhur me gjyqtarët që kanë kanë çuar vendimin në Strasburg, Rama tha: “Është e drejta e tyre, reforma në drejtësi është kali i betejës së kësaj shumice dhe vijon që të zbatohet në harmoni të plotë me SHBA-BE të tjerat janë aspekte dytësore të një procesi që ecën dhe nuk ndalet më edhe në 30 Qershor”.
