Delina Ibrahimaj do të zëvendësojë Enton Duron në krye të Tatimeve. Ibrahimaj ka mbajtur postin e drejtueses së INSTAT, ka punuar në BSH si dhe në Kryeministri.
Shkarkimi – Me vendim të Këshillit të ministrave, qeveria shkarkoi të mërkurën Enton Duron nga posti i drejtorit të Përgjithshëm i Tatimeve. Në VKM e lirimit nga detyra të Duros, thuhet se propozimi u bë nga ministrja e Financave dhe Ekonomisë. “Në mbështetje të nenit 100 të Kushtetutës dhe pikës 2, të nenit 17, të ligjit nr.9920, datë 19.5.2009, ‘Për procedurat tatimore në Republikën e Shqipërisë’, të ndryshuar, me propozimin e ministrit të Financave dhe Ekonomisë, Këshilli i Ministrave vendosi: Zoti Enton Duro, drejtor i Përgjithshëm i Tatimeve, shkarkohet nga kjo detyrë. Ngarkohen Ministria e Financave dhe Ekonomisë dhe Drejtoria e Përgjithshme e Tatimeve për zbatimin e këtij vendimi.Ky vendim hyn në fuqi menjëherë”, thuhet në vendim. Enton Duro e mori detyrën e kreut të Tatimeve në Mars 2019, duke zëvendësuar në këtë post Vasilika Vjeron.
Kush është drejtoresha e re – Ibrahimaj ka mbajtur postin e drejtueses se INSTAT, qe prej vitit 2016. Ajo erdhi në krye të këtij institucioni, i cili u drejtua për një periudhë të shkurtër nga Mirela Muça, për shkak të ndarjes në mënyrë të parakohshme nga jeta të ish-drejtorit Gjergj Filipi. Sipas të dhënave publike që raportoi INSTAT, Ibrahimaj mban gradën Doktor (PhD) në Bankë dhe Financë nga Universiteti i Romës, Tor Vergata. Ajo ka punuar në Bankën e Shqipërisë dhe në Kryeministri (para se të merrte drejtimin e INSTAT), si koordinatore për krijimin e një sistemi të integruar shkëmbim informacionesh dhe statistikash operacionale mes instituteve shtetërore. /BN/
Prezantoi drejtoreshën e re/ Rama paralajmëron furtunë në Tatime
