Sindikata Kombëtare e qendrave të Kontaktit ‘Solidariteti’, ka njoftuar se do të protestojë ditën e nesërme para Gjykatës së Shkallës së Parë në Tiranë, pasi kërkojnë njohjen e statusit Juridik të shoqatës.
Sindikata njofton se anëtarët e saj do të jenë nesër para gjykatës së Tiranës, për të kërkuar njohjen sa më parë të të drejtave të tyre dhe për t’i thënë stop zvarritjeve burokratike.
Njoftimi i Sindikatës:
Nesër në orën 10:00, përpara Gjykatës së Shkallës së Parë në Tiranë, anëtarë dhe aktivistë të Sindikatës Solidariteti do të mblidhen për të kërkuar njohjen e statusit juridik të Sindikatës dhe ndalimin e zvarritjes burokratike për këtë çështje, e cila po bën gati 5 muaj, që nga data 17 shkurt kur edhe është themeluar sindikata.
Gjykatësja Marinela Osmani, pasi ka refuzuar njëherë njohjen e statusit juridik, në shkelje të dyfishtë të ligjit, siç do e sqarojmë dhe në komunikatën tonë, është përzgjedhur për të gjykuar çështjen tonë edhe për herën e dytë.
Në këto kushte, e shohim të rrugës bërjen publike të rastit tonë, duke shpresuar që zonja gjykatëse, këtë herë të veprojë në përputhje me ligjet vendore dhe ndërkombëtare dhe mos të zvarrisë njohjen e sindikatës, konform normave dhe ligjeve vendore e ndërkombëtare.