Krimi i organizuar i ka shpërndarë tentakulat gjithandej. Këtë fakt e ka pranuar edhe Drejtori i Policisë së Shtetit Ardi Veliu, i cili, i ndodhur përballë delegacionit të EUROPOL në një deklaratë për mediat, e konsideroi krimin të ndërlikuar, të shtritë në hapësirë dhe që nuk njeh kufijë ngjyrë apo kombësi.
Shqipëria vuan nga rritja e kriminalitetit dhe nga pamundësia për ta luftuar atë në kohë reale dhe në themel.
Për këtë qëllim është kërkuar shpesh edhe ndihma e ndërkombëtarëve dhe partnerëve të huaj siç është edhe EUROPOL, pa të cilin përfaqësuesit e Ministrisë së Brendshme dhe Policisë së Shtetit thonë se do të ishte e vështirë.
“Krimi i organizuar është i ndërlikuar, i shtrirë në hapësirë dhe s’njeh kufij, ngjyrë apo kombësi dhe për këtë, bashkëpunimi është domosdoshmëri për të përmbushur detyrën më kryesore, krijimin e një mjedisi të sigurt për qytetarët, biznesin dhe turistë.
EUROPOL-i si organizatë e Bashkimit Europian për zbatimin e ligjit, synon të përmirësojë efektivitetin dhe bashkëpunimin ndërmjet agjencive ligjzbatuese të shteteve anëtare, për parandalimin dhe luftën kundër krimeve të rënda, krimit të organizuar ndërkombëtar dhe terrorizmit”, u tha gjatë takimit me përfaqësues të EUROPOL.
Gjatë vitit 2018, nga Zyra Kombëtare e EUROPOL-it janë zhvilluar 8 operacione, ndërsa gjatë këtij 6 mujori janë zhvilluar 12 operacione.
Vetëm muajit e fundit janë zhvilluar tre operacione ndërkombëtare të rëndësishme të koordinuara dhe drejtuara nga EUROPOL, ku Policia e Shtetit ishte pjesëmarrëse njësoj si homologët e saj, konkretisht:
Operacioni “Viribus”, për goditjen e grupeve kriminale që merreshin me trafikimit të ilaçeve falsifikuara;
Operacioni “OPSON VIII”, për goditjen e aktivitetit kriminal të prodhimit, tregtimit, trafikimit të produkteve ushqimore dhe pijeve nën/standarde dhe të falsifikuara;
Operacioni GOLDFINGER, i koordinuar nga EUROPOL për goditjen e një grupi të organizuar kriminal, i cili kishte kontrabanduar, shitur dhe shpërndarë armë dhe drogë në shtetet e BE-së.
