Tetë persona, me lidhje gjaku mes tyre, janë vënë në pranga nga policia italiane e Milanos për akuza që lidhen me drogën dhe prostitucion. Lajmi raportohet këtë të shtunë nga mediat italiane që shkruajnë se anëtarët e bandës janë nga Lezha, por pa dhënë detaje për gjeneralitetet.
Një klan familjar, i organizuar mirë, pothuajse i padepërtueshëm falë lidhjeve të gjakut. Megjithatë, policia arriti të gjejë elementet e nevojshme për të çuar në burg tetë pjesëtarë të bandës. Akuzat: trafikimi ndërkombëtar i drogës dhe shfrytëzimi i prostitucionit. Ishin pikërisht të ardhurat e fituara nga shfrytëzimi i disa grave rumune që investoheshin në trafikun e kokainës.
Operacion u krye nga policia e Milanos, që bashkëpunoi me policinë shqiptare. Rezultati është ekzekutimi i masave të arrestit me burg firmosur nga gjykata e Monzës për tetë shtetas shqiptarë të cilët konsiderohen përgjegjës për trafikimin e drogës dhe shfrytëzimin e prostitucionit. Policia gjithashtu kreu një sërë sekuestrimesh që çuan në konfiskimin e një apartamenti, dy llogari rrjedhëse dhe dy makina në pronësi të të dyshuarve.
E gjitha nisi në prill 2017. Asokohe agjentët filluan hetimet për rastin falë rezultateve të proceseve të tjera penale të hetuara nga prokurorët e Monza-s dhe Treviso-s. Bindja e hetuesve ishte se kishin të bënin me një grupi kriminal shumë të organizuar dhe të ngushtë, falë marrëdhënieve familjare. Të arrestuarit janë të gjithë nga e njëjta familje nga Lezha. Sipas rezultateve të hetimit, klani importonte në Itali me çdo ngarkesë ndërmjet 15 dhe 20 kilogramë kokainë, të cilën pastaj e rishiste me një çmim më të lartë në sasi prej 1 ose 2 kg shqiptarëve të tjerë.
Grupi fitonte si nga trafiku i drogës ashtu edhe shfrytëzimi i prostitucionit. Anëtarët e grupit detyronin gjashtë ose shtatë gra me origjinë rumune të shisnin trupin në Milanos dhe Monza. Secila fitonte rreth 3 apo 4 mijë euro për një natë dhe ishte i detyruar t’ia dorëzonte tutorëve. Territori nën kontrollin e bandës u ruajt dhe mbrojt edhe me dhunë. /BN/