Gjykata për Krime të Rënda pranoi kërkesën e Prokurorisë dhe mori të pandehur 51 persona për trafikimin e paligjshëm të qenieve njerëzore.
Gjatë një seance maratonë që zgjati rreth 8 orë, Krimet e Rënda e konsideruan hetimin e Akuzës të plotë dhe dërguan për gjykim në themel dosjen e përbërë nga 95 fashikuj. Burime thonë se pjesa më e madhe e të pandehurve i janë drejtuar Gjykatës me një kërkesë për t’u proceduar me gjykim të shkurtuar. Kërkesa do të shqyrtohet nga treshja e gjyqtarëve që do të gjykojnë në themel dosjen.
Më shumë se dy vite hetime të Prokurorisë për Krime të Rënda kanë zbardhur veprimtarinë kriminale të grupit, i cili ka trafikuar rreth 500 shqiptarë në vende të ndryshme të Bashkimit Europian, Amerikë dhe Kanada. Duke iu referuar hetimeve, rezulton se secili prej këtyre personave ka vepruar në kuadër të grupit kriminal dhe çdonjëri prej tyre ka pasur një rol.
Mësohet se aktiviteti kriminal ishte i shtrirë në disa vende nga Maqedonia, Bullgaria, Kosova, Sllovenia, Italia, Spanja, Portugalia, Franca, Irlanda deri në vendet e Amerikës Latine.
Kur trafikimi bëhej në Mbretërinë e Bashkuar, përdoreshin transit vendet e BE-së, ndërsa në rast se do kalonin në mënyrë të paligjshme në Kanada dhe SHBA, përdoreshin si vende transit Meksika, Panamaja dhe Republika Dominikane. Shumat që paguanin të interesuarit për të kaluar në mënyrë të paligjshme varionin nga 7000 deri në 9000 paund për në Mbretërinë e Bashkuar dhe 25000 deri në 30000 dollarë për në ShBA dhe Kanada.
Nga hetimet e Prokurorisë për Krime të Rënda, si pjesë e grupit kanë rezultuar edhe dy punonjës të Policisë, të cilët tashmë janë në masën e sigurisë “Arrest në burg”. Hetimet për ish-dy policët janë ndarë dhe vazhdojnë ende, për të zbardhur bashkëpunëtorët e tjerë të tyre.
SHTRIRJA
Hetimi për grupin kriminal ka nisur pas referimit në Prokurorinë për Krime të Rënda të Sektorit për Hetimin e Trafikut të Paligjshëm në sajë të informacioneve të grumbulluara. Referimi është bërë në shkurt të vitit 2017 dhe sipas këtij referimi, një grup kriminal ushtronte veprimtarinë kriminale, atë të dhënies ndihmë për kalim të paligjshëm të kufirit. “Në bazë të këtij materiali, Prokuroria pranë Gjykatës së Shkallës së Parë për Krimet e Rënda Tiranë ka regjistruar procedimin penal Nr. 53 për veprën penale ‘Dhënie ndihmë për kalim të paligjshëm të kufirit, kryer në kuadër të grupit të strukturuar kriminal’, parashikuar nga nenet 298/a, 333/ a të Kodit Penal”, shkruhet në kërkesën për gjykim të prokurorit.
Sipas hetimeve të kryera nga prokurori Eugen Beçi, grupi kriminal e kishte shtrirë aktivitetin e tij jashtë territorit të Shqipërisë, si në Maqedoni, Bullgari, Kosovë, Slloveni, Itali, Spanjë ,Portugali, Francë, Irlandë deri në vendet e Amerikës Latine. Grupi kriminal në fokus të veprimtarisë së tij kishte dhënien ndihmë për kalim të paligjshëm të kufirit kundrejt pagesës, shtetasve që dëshironin të emigronin në mënyrë të paligjshme kryesisht në shtetet si Irlandë, Mbretëri e Madhe, SHBA/Kanada, shtete në të cilat vetëm me viza mund të udhëtosh. Shtetasit që dëshironin të emigronin në mënyrë të paligjshme kundrejt pagesave ishin shtetas shqiptarë.
ROLET
Sipas Prokurorisë, anëtarët e grupit janë shtetas shqiptarë, maqedonas dhe bullgarë. Anëtarët kishin nga një rol të përcaktuar nga personat që siguronin kontaktet me të interesuarit për të emigruar në mënyrë të paligjshme në drejtim të Mbretërisë së Bashkuar, ShBA dhe Kanada. Më poshtë po rendisim disa nga këto role: Personat që ishin garantë dhe mbajtës të vlerave monetare, që paguheshin nga personat e interesuar për të emigruar në mënyrë të paligjshme; personat që siguronin rezervimet e udhëtimeve dhe akomodimin e të interesuarve për të emigruar në mënyrë të paligjshme (klientët); personat që siguronin dhe prodhonin dokumentet e falsifikuara; personat që transportonin dokumentet e falsifikuara; personat që kryenin transportimin dhe shoqërimin e personave të kontrabanduar; personat që bënin pritjen e tyre dhe akomodimin në hotel deri në momentin e udhëtimit drejt destinacionit final dhe organizatori i aktivitetit kriminal.
