Nga Boldnews.al
Në një mesazh ditën e djeshme, Ambasada e Shteteve të Bashkuara të Amerikës mirëpriti gjetjet paraprake të Misionit të Vëzhguesve të OSBE-ODIHR. Ambasada injoroi të gjitha gjetjet dhe u mjaftua vetëm me një fjali të shkëputur nga raporti, të cilën edhe atë e deformoi.
Raporti theksonte se VOTIMI u zhvillua përgjithësisht në mënyrë të qetë dhe paqësore. Ndërkohë, Ambasada e deformoi këtë fjali, duke e përgjithësuar që ZGJEDHJET ishin të qeta dhe të rregullta. OSBE-ODIHR qartësoi në konferencën e ditës së djeshme që nëse zgjedhjet ishin apo jo të rregullta, do ishin në gjendje të thonin vetëm pas dy muajve, kur të ketë mbaruar i gjithë procesi.
Por ajo që e bën akoma më pakuptim mesazhin e nxituar të Ambasadës së SHBA-së, është fakti se sipas saj kush dëshiron të sfidojë rezultatin e zgjedhjeve, duhet të presi Gjykatën Kushtetutese.
Kjo është një “gafë” e rëndë dhe e shumëfishtë e Ambasadës. Kuptohet jo për shkak se në këtë institucion të rëndësishëm mungojnë ekspertët ligjorë, por ishte një formë mirëfilltas trysnie, për veshët që duhet të dëgjonin direkt.
Gjithashtu duke qenë përfaqësues i rëndësishëm diplomatik në Shqipëri, për një çështje me shumë ndjeshmëri, si votimet e 30 qershorit, diplomatikisht gaboi dhe nxitoi. Më së paku duhet të ishte dalë me një qëndrim të përbashkët edhe me ambasadat e tjera të disa vendeve të BE-së të akredituar në Tiranë.
Megjithatë, ky nxitim, pas një pauz heshtje gati “mortale” të mazhorancës kur doli raporti i OSBE-ODHIR, është përtej fakteve, situatës në vend dhe mbi të gjitha konceptit demokratik që qytetarët më së paku duhet të kenë alternativë zgjedhje. Së pari, rezultati zgjedhor sfidohet në Komisionin Qendror të Zgjedhjeve dhe në Kolegjin Zgjedhor, dhe jo në Gjykatën Kushtetuese.
E dyta, Gjykata Kushtetuese nuk funksionon në Shqipëri dhe sfidimi i rezultatit zgjedhor ka afatet e tij. Edhe në rast të krijimit sa më të shpejtë të Gjykatës Kushtetuese, ajo nuk mundet ligjërisht që të marrë në duar procesin e votimeve, nëse ato duhet të njihen ligjërisht ose jo. Gjykata Kushtetuese, me gjasë, materialin e parë që do ketë në zyrë është shqyrtimi i dy dekreteve të kreut të shtetit që kanë të bëjnë me anulimin e datës së zgjedhjeve të 30 qershorit dhe caktimit të një tjetër date, atë të 13 tetorit të këtij viti.
Nuk është aspak çudi që komisioni politik hetimor që është ngritur për të gjetur shkeljet e Metës do e ketë përfunduar raportin duke ia paraqitur “deleve” të Parlamentit, që do të “blegërijnë” me ngritje kartonësh sipas fërshëllimës që do vijë nga “bariu” me gunën e kryeministrit. Pra, Gjykata Kushtetuese mund të ketë njëkohësisht edhe vendimin e Parlamentit për shkarkimin e Presidentit të Republikës Ilir Meta, pa pasur tagër kryesor çështjen e votimeve, për më shumë leggjitimitetin e tyre, që kurrsesi nuk mund ta bëjnë për shkak të mungesës së kompetencës.
Duke iu rikthyer deklaratës së ambasadës së SHBA-së në vendin tonë, Partia Socialiste konkuronte me veten në këto zgjedhje dhe është ofenduese t’i thuash shqiptarëve që kush don të sfidojë rezultatin e zgjedhjeve të presë Gjykatën Kushtetuese. Partia Socialiste nuk mund të sfidojë rezultatin e zgjedhjeve ku vetë konkuronte, vetë administronte, vetë votonte, vetë numuronte.