Zëdhënësi i Presidentit Ilir Meta, Tedi Blushi, ka reaguar ndaj deklaratave të analistit Baton Haxhiu në studion e emisionit “Opinion” për presidentin Ilir Meta. Haxhiu u shpreh se Ilir Meta duhet të japë dorëheqjen pas zgjedhjeve të djeshme.
Për këtë deklaratë Blushi u shpreh se Meta do të vazhdojë të jetë President deri në 24 korrik 2022.
“Ilir Meta do të jetë President i Republikës deri në 24 korrik 2022. Është më e ndershme që zëdhënësi i Stanishiçit të vazhdojë të marrë rrogën si këshilltar i Ramës sesa t’ i japë konsulencë falas të pakërkuar Presidentit. Kanë rënë ata që duke ndarë Shqipërinë, duan të ndajnë Kosovën”, shkruan Blushi.
Lidhur me këtë deklaratë i pyetur nga moderatori Blendi Fevziu për një reagim, Baton Haxhiu u shpreh:
“Më vjen keq sesi shkruan Iliri, më mirë t’ia shkruaj dikush, se është një frazist që interpreton atë që i thonë të tjerët. Është e turpshme që dy njerëz (i referohet Berishës dhe Metës) që kanë udhëhequr Shqipërinë kanë këtë gjuhë. Meta ka një meritë në vitet 2004-2005, se ka kontribuar për atë që ka ndodhur në atë kohë. Pas asaj kohe gjithçka që është rreth Metës, me mënyrën si e mësojnë, është njeriu që nuk e meritojnë”, është shprehur ai.
