Nga Boldnews.al
Sot në Shqipëri u zhvilluan votimet, ku për herë të parë pas 29 vjetësh pluralizmi politik, u zhvillua një proces i ngjashëm me ato të kohës së diktaturës komuniste.
Plot 32 vjet nga viti 1987, që ishin zgjedhjet e fundit monopartiake, Edi Rama hyn në historinë e pluralizmit shqiptar, si drejtuesi më i lartë politik, që përsërit të njëjtin proces, zhvillon votime pa opozitë dhe që ka si garniturë 35 apo 36 parti, që i ngjajnë kioskave që morën hov në vitet e para të demokracisë.
Edi Rama foli sot për fitore, ndërsa e paraqiti atë të vështirë, edhe pse farsa elektorale që krijoi, zhvilloi dhe po përpiqet ta mbyllë, i garanton pushtetin absolut, atë të drejtimit të 61 bashkive.
I mbuluar nga djersët, Rama premtoi edhe një mea culpa, që do të niste me një analizë të thelluar të qeverisjes së tij.
Ndërkohë që Edi Rama shpaloste fitoren imagjinare, KQZ në anën tjetër kujdesej të rregullonte shifrat, pasi e vetmja gjë që i shëmton procesin, janë pikërisht ata shqiptarë që bojkotuan farsën.
Më në fund, KQZ arriti të çojë shifrën e pjesëmarrjes në 21 %, ndërsa vetëm për 1 orë, sipas shifrave zyrtare kanë votuar plot 100 mijë persona, duke çuar shifrën zyrtare në 771 mijë votues.
Pak minuta më pas opozita deklaronte të tjera shifra, duke dhënë versionin e saj në rreth 535 mijë votues, apo 15 % e numrit të përgjithshëm të zgjedhësve.
Por për një moment le të besojmë se shifra e dhënë nga KQZ është reale, nuk ka pasur asnjë ndërhyrje, asnjë mbushje kutie, asnjë presion, asnjë blerje.
Nëse i referohemi zgjedhjeve të 2017, socialistët e drejtuar po nga Rama, grumbulluan 764 mijë vota. Dy vjet më parë ishin të vetëm dhe kanë marrë 7 mijë vota më pak se numri i përgjithshëm i votuesve që sot iu drejtuan kutive.
Sot 771 mijë, është numri i votuesve që iu drejtuan kutive, duke pasur në listë 36 parti, që sikur të kenë marrë një mesatare prej 500 votash në rang vendi, zbresin sërisht shifrat e mbështetësve të Rilindjes.
Dhe të mendosh se sot presioni ndaj pjesëmarrjes në votime ishte shumë më i madh se ai i dy viteve më parë, pasi këtë rradhë Rilindja kishte menduar për një skemë, përmes të cilës çdo i punësuar në administratë, përveç detyrimit që kishte për të ofruar familjarët e tij në proces, duhej të garantonte edhe 10 votues të tjerë.
Ky skenar ishte pagëzuar me emrin “skema e patronazhit” dhe me një përllogaritje të thjeshtë, numri i votuesve duhej të ishte minimalisht mbi 1 milion, aq sa socialistët, LSI dhe PDIU, kishin marrë në 2013, dhe që Rama i paraqiste si 1 milionë shuplakat ndaj PD.
Sot Rama provoi shuplakat, shkelmat, grushtat, e 80 % të votuesve, sipas shifrave të KQZ, apo 85 % të tyre sipas atyre të PD.
Pra më 30 qershor, Rama me apo pa dashje, i ndërgjegjshëm ose jo, provoi mbi 2.7 milionë shuplaka, grushta apo shkelma. Ndoshta kjo shifër shpjegon edhe djersët e ftohta që mbuluan kryeministrin përgjatë deklaratës nga selia e PS-së, edhe pse dikush ishte kujdesur që në sfond të kishte duartrokitje apo brohorima fitoreje.
