Nga Boldnews.al
Ajo që ndodh sot është pasojë me shkak të kahershëm, që më shumë se strategji, mbetet sjellje karakteri e kryeministrit Edi Rama. Shoqërinë e transformoi në gjashtë vite qeverisje, duke e kthyer në një laborator eksperimental, më qëllimin e pastër; të “vriste” çdo zë intelektual; dhe mbyllte gojën qytetare, duke e kthyer në shoqëri amorfe.
Rama i hapi luftë dy kategorive të para dhe sot ka krijuar oazin e tij të Rilindasve. Personazhe politik dhe publik të cilët trasmetojnë dhe injektojnë me qëllim “idiotësinë” që përfaqësojnë dhe malinjitetin e theksuar në urrejtje të çdo kategorie që kërkon lirinë, normat demokratike dhe të drejtat qytetare.
Në vitin 2013, Rama e nisi nga Partia Socialiste zhdukjen e botës intelektuale. Cilido zë kritik, i mirëformuar, nuk e gjeti vendin në pjesën drejtuese të partisë. Më vonë, ai i shmangu të gjithë, duke sjellë një parlament ndër më të turpshmet që ka njohur ndonjëherë vendi ynë.
Trafikantë, përdhunues, grabitës, e deri të akuzuar për vrasje, zunë vend në karriget e deputetëve, aty ku më parë, në vitet 1991-2005 kishte personalitete, njerëz të botës akademike dhe disa syresh edhe me integritet moral.
Pushtetin e ndau me maskrenjtë, që një ditë nga bota e errët e krimit dhe kabaretë e prostitucionit dhe drogës, e panë veten në institucionin më të lartë të vendit, në Parlament.
Këta ishin “përfaqësuesit e popullit”. Përveç afrimit të “halabakëve”, risolli një tjetër kategori të rinjsh. Ishin Rilindas që në hapat e parë. Personazhe pa lidhje me realitetin, të dala nga organizata jo qeveritare dhe individë me formim të pastër në fushën e mashtrimit dhe shitjes së propagandës.
Sot në Partinë Socialiste nuk gjen më ata socialistë “idealesh”, që gjithsesi kishin bindjet e tyre dhe rendnin pas progmareve politike, luftonin me ide me kundërshtarët dhe militonin fort, pasi zëri i tyre, qoftë edhe në kategorinë e poshtme drejtuese gjithsesi dëgjohej.
Rama nuk i honepste dot intelektualët, burrat e shtruar, apo gratë me personalitet. Ai kërkonte një tjetër shtresë, një tjetër përfaqësim që të ishte edhe më poshtë se vetja. Nën frikën e vazhdueshme të inferioritetit të intelektit, Rama ishte dhe është një gjeni në hartimin e programit për fshirjen nga elita drejtuese të çdo eksperti të mirë që politikën e sheh si sfidë dhe alternativë.
E pati disi të lehtë ta bëntë këtë zhdukje të politikanëve të “rracës” brenda PS-së, duke kapërcyer në fazën më të rrezikshme, që këtë ide ta shtrinte edhe në shoqëri.
Botës masive qytetare, të paangazhuar politikisht, por me vlera në normat shoqërore, arriti tua mbyllë gojën. Bëri që zëri i tyre të mos ndihej. Në një lagje, apo edhe pallat, me siguri gjendet një Rilindas “trushplarë” që shfaq arrogancë, të mbyt që në mëngjes me parfum të shtrenjtë dhe lëviz me atë çantën e lëkurës me rrip të hollë, ku mban shuma të mëdha parash dhe një telefon të shtrenjtë. Ai diku punon, në një institucion nga tatimet, doganat, bashki, apo të ka në duar pronën në Hipotekë.
Ky është njeriu i ri Rilindas, që kërkon ti ngjajë brezi i ri, edhe pse pjesa masive qytetare nuk e do, por nuk është në gjendje as ta rrëzojë. Me dhunë aq që e mendon, pasi qytetaria nuk ia lejon, me votë aq që bëhet fjalë, pasi këtu të merr frymën trafikanti, i forti, nëpunësi idiot e alleshverishtës i pështirë që nën kërcënim, dhe blerje të varfërisë e rimerr pushtetin.
Një pjesë e mirë e kandidatëve për bashki, që të dielën do varin rreth qafës “kapistrën” e kryebashkiakut, janë individë pa kontribute, me shkollim të cunguar, me integritet tërësisht të humbur (mbase nuk e kanë pasur asnjëherë) dhe iluzionistë që njohin vetëm botor virtuale të Ramës. Këta do drejtojnë pushtetin lokal. Në fund të gjithë bashkë; maskarai, trafikanti, “idioti zyrtaruc”, (i korruptuari që ka mësuar të numërojë vetëm duke pasur para në duar) dhe Rilindasi pa shqisë mendimi, kanë në krye një njeri të madh: Ai është Edi Rama… Dhe kryeministri mburret… unë jam mbi ta!
Pjesa tjetër janë intelektualë të zhdukur që bëjnë jetë modeste dhe qytetarë të mirë që vuajnë pasojat e njerëzve të mësipërm që na drejtojnë shtetin. Me dhunë nuk i shembim, me votë na vjedhin, ndaj pasoja do jetë e gjatë.
