Ashtu si Delegacioni i BE në Tiranë, edhe ambasada britanike në Tiranë flet për “votime” dhe jo “zgjedhje”, në një deklaratë lidhur me 30 qershorin.
Ambasada bën thirrje për “të gjithë të përfshirët në 30 qershor“ që shmanget çdo formë e nxitjes së dhunës. Një mesazh ky drejtuar më shumë PS-së, e vetmja forcë politike në garon e vetme në më shumë se 50 përqind të bashkive, sesa opozitës që ka bojkotuar votimet.
“Mbretëria e Bashkuar beson se qytetarët kanë të drejtën për të hedhur votën në mënyrë të sigurtë dhe paqësore. Të gjithë të përfshirët në 30 qershor, të dielën, duhet të luajnë pjesën e tyre për të siguruar një mjedis paqësor dhe të sigurtë. Çdo formë e nxitjes së dhunës është e papranueshme. Ne mbështesim misionin ndërkombëtar të OHDIR për të monituar procesin e votimit”.
Por deklarata nuk mungon të evidentojë që të hetohen “akuzat për korrupsion dhe krimet zgjedhore, si blerja e votës”, sepse “askush nuk është sipër ligjit”.
Ambasada gjithashtu u bën thirrje palëve politike për dialog për daljen nga kriza.
“Në protestën e fundit të mbajtur më 21 qershor 2019, ne pamë një demonstratë paqësore që mbajti lart vlerat demokratike dhe ne nxisim që të njëjtat parime të ndiqen edhe në 30 qershor. Ne i kërkojmë lidërve politikë të përmbahen nga provokimet dhe retorika nxitëse. Ne vazhdojmë të bëjmë thirrje për të gjitha palët që të përfshihen në një dialog konstruktiv për t’i dhënë fund kësaj politike në rrugë pa krye. Shqipëria këtë mund ta bëjë vetëm nëpërmjet bisedimeve për të zgjidhur situatën aktuale politike dhe të përqendrohen në krijimin e Gjykatës Kushtetuese dhe reformës zgjedhore duke përfshirë rekomandimet e mëparshme të OHDIR”, thuhet në deklaratë.
