Sipas kryetarit të Bashkisë së Tiranës, Erion Veliaj, e vetmja negociatë me Bashën është që të rrijë urtë dhe të mos krijojë probleme datën e zgjedhjeve.
Gjatë emisionit “Byro Politike” të Juli Xhokaxhi, Veliaj, i cili pasoi Bashën në krye të Bashkisë së Tiranës, tha se këto negociata kreu i PD-së i ka me partnerët ndërkombëtarë.
Sipas tij, sa herë që opozita merr mesazhe dhe paralajmërime nga partnerët, bën protesta paqësore. Ndër të tjera, ai theksoi se liderët e opozitës kanë frikë nga ndërkombëtarët.
Pyetjes se a ka negociata të fshehta mes zotit Rama dhe zotit Basha?
“Di se ka negociata me Bashën që të rrijë urtë dhe që të mos bëjë zarare në datën 30.”
Veliaj pretendoi se paralajmërimet vijnë “prej ndërkombëtarëve. Po të shikosh kur marrin këto mesazhe bëjnë protesta paqësore. Tek këto protesta marrin fëmijët e tyre. Tek protestat e dhunshme marrin kalamajtë e shqiptarëve. Me kapuç në kokë, me barut në xhep, me molotov në dorë.”
Veliaj tha se kërcënimi amerikan se në rast dhune PD-ja dhe LSI do të klasifikoheshin poshtë organizatave terroriste, i ka trembur, sepse nuk do merreshin më me diplomatë, por me FBI-në, CIA-n dhe organizata të tjera, në të ardhmen.
Erion Veliaj ka vijuar edhe sot fushatën në pritje të një mandati të dytë, në Tiranë, ndonëse konkurrenca e tij deri tani ka mbetur me përfaqësuesin e Bindjes Demokratike, Arben Skënderi.
