Gjashtë prona të paluajtshme, makina dhe mjete lundrimi janë vënë nën sekuestreo preventive me vendim të Gjykatës së Vlorës. Burime zyrtare nga Policia njoftuan këtë të enjte se, këto sekuestrime pasurore janë në kuadër të procedimit penal pro-aktiv të vitit 2018, ndaj shtetasit Maks alias Maksim Merkaj, si person i dyshuar për kryerjen e veprës penale “Pastrimi i produkteve të veprës penale ose veprimtarisë kriminale”.
“Seksioni për Hetimin e Krimit Ekonomik e Financiar pranë Drejtorisë Vendore të Policisë Vlorë, në bashkëpunim me Prokurorinë e Rrethit Gjyqësor Vlorë, zbatuan vendimin penal të Gjykatës së Shkallës së Parë Vlorë, për vendosjen e sekuestros preventive mbi disa objekte: 5 apartamente banimi; 1 vilë trekatëshe; 1 mjet lundrimi, anije peshkimi; 4 automjete. Këto sekuestrime pasurore janë në kuadër të procedimit penal pro-aktiv të vitit 2018, ndaj shtetasit M.M. si person i dyshuar për kryerjen e veprës penale ‘Pastrimi i produkteve të veprës penale ose veprimtarisë kriminale’. Vlera financiare e këtyre pasurive kap shifrën rreth 1.503.000 euro. Vijojnë veprimet e tjera proceduriale, nga Prokuroria pranë Gjykatës së Shkallës së Parë Vlorë”, thuhet në njoftimin e Policisë së Vlorës.
52-vjeçarit Maks Merkaj është arrestuar që prej korrikun e vitit të shkuar në Vlorë me qëllim ekstradimin në Itali.
“Këtë shtetas, Gjykata e Assizes Venecia, Itali, me vendimin nr. 1/2001 R.G.C.Ass, datë 10.04.2011, e ka dënuar me 17 vite burgim, mbetur për të vuajtur edhe 14 vite, për veprat penale ‘Organizatë kriminale’, ‘Pengmarrje’, ‘Marrëdhenie seksuale me dhunë’ dhe ‘Shfrytëzim prostitucioni’, parashikuar nga nenet 61,81,110,519,600,605 të Kodit Penal Italian”, njoftoi asokohe policia e Vlorës. /Boldnews.al/
