Ish-kreu i PD-së së Elbasanit, Aurel Bylykbashi, do të hetohet në gjendje të lirë për deklaratat që ka bërë lidhur me zgjedhjet e 30 qershorit.
Policia ka njoftuar sot se ai po hetohet i lirë për veprat penale “Thirrje publike për veprime të dhunshme”, “Pengimi me dhunë i veprimtarisë së partive politike” dhe “Pengimi i subjekteve zgjedhore”.
Gjatë prezantimit të Aleancës Qytetare për Mbrojtjen e Demokracisë në Elbasan, Bylykbashi, teksa i referohej zërave që sipas tij parashikojnë kasandrën, tha “domethenë do të ketë lufte civile, do të ketë vellavrasje! Po e them prerë dhe qartë: Ne nuk do të lejojme zgjedhje në 30 Qershor!”.
“Ne duhet të jemi të gjithë atje, në Bradashesh dhe ti themi më qarte se kurrë, se ky qytet nuk të do, ky vend nuk të do dhe nuk ka burg që mund të na ktheje nga rruga jonë!! Jemi më të qartë se kurrë!”, u shpreh ai.
NJOFTIMI I POLICISE
Specialistët për Hetimin e Krimit Kundër Personit, në DVP Elbasan proceduan penalisht në gjendje të lirë për veprat penale “Thirrje publike për veprime të dhunshme”, “Pengimi me dhunë i veprimtarisë së partive politike” dhe “Pengimi i subjekteve zgjedhore”, shtetasin A.B., 53 vjeç, banues në Elbasan.
Në media dhe rrjete sociale ai ka bërë thirrje për veprime të dhunshme dhe pengim të procesit të votimit më datë 30 qershor 2019.
Materialet hetimore i kaluan Prokurorisë pranë Gjykatës së Shkallës Parë Elbasan, për veprimet e mëtejshme.
