Ministrja e Shëndetësisë dhe Mbrojtjes Sociale, Ogerta Manastirliu deklaroi se OSBE/ODIHR ka ekskluzivitetin për monitorimin e zgjedhjeve. E ftuar në Televizionin “Ora Neës” për të komentuar situatën politike në vend, Manastirliu tha se Kongresi i Autoriteteve Lokale nuk është shprehur as mbi datën e zgjedhjeve dhe as mbi ligjshmërinë e tyre.
“I vetmi institucion qe ka ekskuzivitetin e zgjedhjeve është OSBE/ODHIR. Dhe do të jenë këtu më 30 Qershor. Madje dhe sot janë shprehur se do të vazhdojnë monitorimin, me vëzhgues të shtuar” – tha Manastirliu.
Manastirliu ka komentuar dhe proçedurat për shkarkimin e Presidentit Meta. “Çdrekretimi i datës së zgjedhjeve është një akt nul, i pavlefshëm, e konfirmoi edhe Kolegji Zgjedhor me votimin 5 me 0. Presidenti ka tejkaluar kompetencat e veta, ndaj Komisioni i Ligjeve ka vijuar procedurat për shkarkimin e Presidentit. Unë besoj se historia do të na gjykonte keq nëse nuk do të zbatonim ligjin” – u shpreh Ministrja Manastirliu.
Duke u ndalur tek data e zgjedhjeve, Manastirliu bëri këtë apel për qytetarët: “Me 30 Qershor qytetarët do shkojnë të votojnë sipas Kushtetutës, do të votojnë për zhvillimin e vendit dhe distancimin nga aktet e dhunës dhe gjuhës së urrejtjes. Personalisht mendoj që nuk do të ketë përplasje me 30 Qershor dhe te gjitha institucionet do të jenë në krye të detyrës për mbarëvajtjen e zgjedhjeve. Shqiptarët janë të mençur dhe nuk do ju shkojnë pas një grupi njerëzish për të njollosur veten e tyre, prandaj ju bëj thirrje qytetarëve që të mos ju shkojnë pas atyre që mendojnë për vëllavrasje, pasi ligji do të jetë i njëjtë për të gjithë”, tha Manastirliu.
